Магистраль қызметкерлері марапатталды
«Қазақстан теміржолшысы» газетінің тілшісі
Теміржолшылардың төл мерекесінде Магистральдық желі дирекциясының үздік қызметкерлері түрлі марапаттарға ие болды. Салтанатты жиында дирекция басшысы Сәкен Рахметов әріптестерін құттықтап, лайықты наградаларын табыс етті.
– Ел экономикасын алға сүйреп, мемлекетіміздің дамуына зор үлес қосып келе жатқан теміржол көлігінің барша қызметкерлерін мейрамымен шын жүректен құттықтаймын! Бүкіл өмірін осы салаға арнап, өзінің адал еңбегі, мол тәжірибесімен темір жолды дамытуға үлес қосып жүрген сіздер қандай құрметке де лайықсыздар, – деді С.Рахметов.
«Құрметті теміржолшы» атағымен 4 адам, «Кәсібі бойынша үздік» төсбелгісімен 2 адам, «Адал еңбегі үшін» төсбелгісімен 4 адам, «Үздік құрылысшы» төсбелгісімен 1 адам, «Үздік жас маман» төсбелгісімен 1 адам, «ҚТЖ» ҰК» АҚ басқарма төрағасының Алғыс хатымен 3 адам және төрағаның Құрмет грамотасымен 1 адам марапатталды.
Сондай-ақ 6 адам «Теміржол саласындағы 10 жыл мінсіз қызметі үшін» белгішесіне, 9 адам «Теміржол саласындағы 20 жыл мінсіз қызметі үшін» белгішесіне, ал 6 адам «Теміржол саласындағы 30 жыл мінсіз қызметі үшін» белгішесіне ие болды.
Жиында кеше ғана теміржолдың жоғары оқу орнын тәмамдап жұмысқа орналасқан жас мамандар да сөз сөйлеп, осындай алып компанияның бір бөлшегі болғанын мақтаныш етті. 6 түлек Ақмола магистральдық желі бөлімшесіне телімге жұмысқа орналастырылса, тағы 40 студент дуалды оқыту бойынша тәжірибеден өтуде.