Колледж оқытушылары ҚТЖ-да тағылымдамадан өтті
«Қазақстан теміржолшысы» газетінің тілшісі
Көлік саласында білім беретін ЖОО және колледжердің профессорлық-оқытушылық құрамы ҚТЖ-да тағылымдамадан өтті. 23 ұстаз екі апта теміржол саласында теориялық білім алып, оқыту бағдарламасының екінші жартысын тәжірибемен ұштастырды.
Тағылымдама барысында қатысушыларға инновациялық залда «ҚТЖ-дағы цифрландыру» тақырыбында дәріс өткізілді. Оларға компаниядағы цифрландыру жұмыстары мен ЖИ енгізу бойынша бейнероликтер көрсетіліп, ауқымды ақпараттар берілді. Атап айтқанда, ЖИ енгізу үшін Ақпараттық технологиялар инфрақұрылымын жаңғырту, тасымал процесін цифрландыру жобалары туралы баяндалды.
– Бұл іс-шараның екі жаққа да тиімділігі зор болатыны сөзсіз. Себебі сіздер – теміржол сияқты үлкен салаға мамандар дайындап жүрген оқытушылар құрамысыздар. Болашақ теміржолшылар заманға сай сапалы білім алуы керек, соған екі жақтап атсалыссақ, теміржолымыз дамитыны анық. Сіздерге сәттілік тілеймін, – деді «ҚТЖ» ҰҚ» АҚ Адами ресурстарды басқару департаментінің HR-серіктесі Алма Сәулебаева.
Бағдарлама шеңберінде ҚТЖ музейіне, Тасымалдарды басқарудың өңірлік орталығына экскурсия ұйымдастырылып, «Күйзеліске төзімділік» тақырыбында тренинг өткізілді. Сонымен қатар олар ҚТЖ бас ғимаратының 37-қабатындағы «Қысқы бақты» тамашалады. АСУ ЭДТ бағдарламасының қалай жұмыс істейтінін көріп, «Ақпараттық және автоматтандырылған жүйелер» оқу құралының таныстырылымына қатысты. ҚТЖ-дағы цифрландыру жұмыстарының бірден бір көрінісі – Бірыңғай цифрлық терезе жұмысы да көрсетілді. Астана станциясындағы дөңестік автоматтандырылған орталықтандыру жұмысымен, электрлі орталықтандырылған қосын қызметімен де танысты.
– Бұл тағылымдама жобасына қатысуға ұсыныс айтылғанда мен қуана келістім. Себебі теория мен тәжірибедегі мамандардың өзара іс-қимылы – болашақ мамандарды оқытып-тәрбиелеуде өте тиімді әдіс. Өткен теориялық бөлімінде осы саланың нағыз мамандарынан көлік және логистика бағытында дәріс тыңдау мүмкіндігі берілді. Теориялық білім беру форматы ұнады, сұрақтарымызды емін-еркін қойдық. Ал қазіргі тәжірибелік дәрісте күн сайын темір жолда еңбек етіп жүрген қызметкерлердің өз аузынан осы саланың жай-күйі туралы тыңдау біліміңді екі есе арттырады, – дейді бағдарламаға қатысушылардың бірі, Қазтұтынуодағы Қарағанды университеті маркетинг және логистика кафедрасының доценті Әлия Аяғанова.
Тағылымдама ҚТЖ мен еліміздің білім ошақтары арасындағы ынтымақтастық аясында жүзеге асырылуда.