Қоғамдық тыңдау өтті

«ҚТЖ» ҰК» АҚ-да 2026-2030 жылдарға электр энергиясын беру бойынша реттелетін қызметтерге компанияның тарифтік сметасы мен тарифін бекіту жөніндегі өтінімдерді қарау шеңберінде қоғамдық тыңдау өтті.

ҚР ҰЭМ Табиғи монополияларды реттеу комитетінің электр энергетикасы саласындағы реттеу басқармасы басшысының міндетін атқарушы Наурызбай Тәукенов қатысушыларды қоғамдық тыңдаудың регламентімен таныстырды. Жария тыңдау ҚР «Табиғи монополиялар туралы» заңның 8-бабы 9-тармақшасына сәйкес өткізілді. Іс-шараға салалық теміржол ұйымдары, қауымдастықтар, ҚР Кәсіпкерлерінің ұлттық палатасы өкілдері және тұтынушылар мен өзге де мүдделі тұлғалар қатысты.  

– Биыл маусым айының соңында ҚТЖ 2026-2030 жылдарға арналған реттелетін электр энергиясын беру қызметі бойынша жаңа бес жылдық тарифтер мен тарифтік сметаларды бекіту туралы өтініммен жүгінген болатын. Атап өтетін жайт, аталған реттелетін қызмет түрі бойынша тарифтің қолданылу мерзімі 2025 жылы аяқталады. Жария тыңдауды өткізудің мақсаты – ҚТЖ-ның реттелетін электр энергиясын беру қызметі бойынша өтінімдерді қарау рәсімінің ашықтығын, жариялылығын, тұтынушылар мен табиғи монополия субъектілерінің мүдделер теңгерімін сақтау, сондай-ақ халықтың ақпараттандырылуын қамтамасыз ету, – деді Н.Тәукенов.  

Күн тәртібіне сәйкес ҚТЖ-ның электр энергиясын беру қыз меті бойынша тариф жобалары талқыланды. «ҚТЖ» ҰК» АҚ Магистральдық желі дирекциясы директорының орынбасары Александр Кирович электр энергиясын беру қызметі бойынша баяндама жасады.  

– Басты мақсат – жарамдылық мерзімі өтіп кеткен күштік трансформаторларды ауыстыру жолымен компанияның электр тарату желілері сенімділігін арттыру. Сонымен қатар кешенді тарату құрылғыларын заманауи түріне алмастыру арқылы компанияның электрмен қамту құрылғыларын жаңғырту көзделуде. Реттелетін қызметке кедергісіз қолжетімділікті қамтамасыз ету, желіні күтіп ұстау мен пайдалану бойынша ағымдағы шығындарды жабу, электр желі нысандарының тозу деңгейін азайтуды да жоспарлап отырмыз, – деді А.Кирович.  

Жария тыңдаудың нәтижесі бойынша тариф жобаларын талқылау қорытындысы мен бекітілгеннен кейінгі тиісті бұйрықтар да комитеттің интернет-ресустарында шығарылатыны мәлімделді.