Білім ордасына – 80 жыл

Теміржол саласына орта буын мамандар дайындайтын Астана қаласының Жоғары ккөлік және коммуникация колледжінің 80 жылдық мерейтойы аясында «Көлік және логистика: жаңа ІТ мүмкіндіктер» атты республикалық форум өтті.  

Форумға Парламент депутаттары, Оқу-ағарту министрлігі, Астана қаласы мәслихаты, қоғамдық кеңес пен қала әкімдігінің білім басқармасы өкілдері, оқу орнының әлеуметтік серіктестері: «ҚТЖ» ҰК» АҚ, «Қазақтелеком» АҚ, «City Transportation Systems» ЖШС және серіктес білім беру ұйымдарының өкілдері қатысты.  

Форумның мақсаты – көлік-логистика саласындағы заманауи үрдістер мен даму перспективаларын талқылауға арналған диалог алаңын құру, жаңа ІТ-шешімдерді айқындау және енгізу, отандық және шетелдік сарапшылар арасында тәжірибе алмасу, сондай-ақ көлік пен логистикадағы цифрлық трансформация саласында халықаралық ынтымақтастықты нығайту.  

Жиында сөз алған «ҚТЖ-Жүк тасымалы» ЖШС бас директоры Асан Үмбетов ҚТЖ мен аталған колледж арасында бұрыннан тығыз қарым-қатынас орнатылғанын жеткізді. Серіктестік басшысы қазіргі таңда ҚТЖ-да жүк тасымалдайтын локомотивтердің серияларын, жаңадан алынған заманауи түрлерін слайдтар арқылы баяндап берді. Қазіргі локомотив бригадалары үшін барлық еңбек жағдайы жасалғанын айтты. Бас директор ҚТЖ атынан колледждің мерейтойына орай соңғы үлгідегі бір локомотив макетін сыйға тартты.  

Форум аясында «Теміржол көлігінде тасымалдауды ұйымдастыру және қозғалысты басқару» мамандығы бойынша кәсіби шеберлік байқауы да ұйымдастырылып, Қазақстан, Беларусь, Ресей, Өзбекстан, Қырғызстан елдерінің колледждерінен 10 студент қатысты. Олар теміржол бойынша модульдік тапсырмаларды орындап, білімдерін сынады.