Корпоративтік көшбасшыларға арналған III модульдік оқыту басталды
«Қазақстан теміржолшысы» газетінің тілшісі
ҚТЖ-да Адами ресустарды басқару департаментінің ұйымдастыруымен «Мамандық көшбасшылары» корпоративтік даму бағдарламасы бойынша ІІІ модульдік оқыту басталды.
100 адамды қамтитын оқыту бағдарламасы 5 күнге созылады. Алғашқы күні қатысушыларға «Үнемді өндіріс» тақырыбында сабақ өткізілді. Ал екінші күні жасанды интеллект, адам құқықтары және сан алуандық қағидаттары, гендерлік теңдік және зорлық-зомбылыққа қарсы тұру тақырыптарында дәрістер мен тренингтер өткізіледі.
Үшінші күнгі сабақ «Күрделі келіссөздерді жүргізу» тақырыбына арналады. Төртінші күнде «Ойлау дизайны» тақырыбы қозғалып, соңғы күні қатысып жатқан барлық 9 команда өз жобаларының таныстырылымын өткізіп, көтерген тақырыптарын қорғайды.
2022-2024 жылдары компания өндірістік қауіпсіздікті және жеке іскерлік қасиеттерді арттыруға бағытталған корпоративтік бағдарлама бойынша өңірлік және желілік деңгейдегі 700-ге жуық қызметкерді оқытты. Олардың арасынан анағұрлым белсенді мамандар, яғни шеберлер, нұсқаушылар, бас инженерлер мен қозғалыс қауіпсіздігі жөніндегі ревизорлар, құрылымдық өндіріс басшыларын қосқанда ең үздік деген 100 маман іріктеліп алынған болатын. «ҚТЖ» ҰК» АҚ Адами ресурстарды басқару департаментінің HR бизнес-серіктесі Алма Сәулебаеваның айтуынша, бұл жоба саланы дамытатын көшбасшылардың кадрлық резервін қалыптастыруға септік етеді. Персоналды дамыту – компанияның бәсекеге қабілеттілігі мен тұрақтылығы жолындағы салынып жатқан инвестиция. Оқу нәтижесінде үздік қатысушылар серіктес-компанияларда тағылымдамадан өтіп, MBA, Mini MBA және магистратура, докторантура бағдарламалары бойынша оқытылады. Соңғы күні барлық қатысушылар сертификаттарға ие болып, үздік жобалар марапатталатын болады.