Жеке даму стратегиясынан дәріс
«Қазақстан теміржолшысы» газетінің тілшісі
Республикалық жастар форумында теміржолшылар белгілі бизнес тренер Дана Мағауинаның «Жеке даму стратегиясының негіздері» тақырыбындағы тренингіне қатысты.
– Менің тренингімде жастарға күшті және әлсіз жақтарын өздеріне жазғызып, көрсету арқылы дамыту бағытында жұмыстар жүргізілді. Мәселен, олар: «Қандай әдеттер маған кедергі келтіреді?», «Қандай жағдайда мен өзіме жиі күмәнданамын?» деген сұрақтарға жауап іздеді. Осылайша олар өздерінің жеке даму стратегиясын жасады. Теміржол жастары өте белсенді және арасында көшбасшылық қасиеттерге ие азаматтар көп екенін бірден байқауға болады. Олар өндірістің ішінде жүрген қарапайым мамандар болғанымен, болашақта арасынан сол салада басшылық ететін мықтылар шығатыны сөзсіз. Осы тұрғыда біздің жұмысымыз – олардың бойындағы озық қасиеттерін дамыта отырып, кемшіліктерімен жеңіл жұмыс істеуге септік ету, – дейді тренер.
Маңғыстаулық Жанболат Қылаубаев форумнан, соның ішінде осындай тренингтерден алған әсері зор екенін жеткізді.
– 2011 жылы Маңғыстау станциясында жүк қабылдап-жөнелтуші болып еңбек ете бастадым. Қазіргі таңда ТХКБ бойынша Ақтау теңіз сауда портында жұмыс істеймін. Алтынкөлден келетін жүктерді кемелерге тиеп Әзербайжанға жібереміз. 4 қыздың әкесімін. Форумнан алған әсерім үлкен. Бүгінгі тренингтің жеке дамуымызға оң ықпалын тигізері сөзсіз. Былай уақытта көп мән бермейтін адамның кейбір осал тұстары мен озық қасиеттерін бағамдап, қайсысына басымдық беру керектігін айтып берді. Сонымен қатар маған тренер Ержан Нұршановтың «Күйзеліспен күресу және көп алдында сөйлеу» атты тренингі де қатты ұнады, – дейді жас теміржолшы.