Донорлар қатары артуда
«Қазақстан теміржолшысы» газетінің тілшісі
«ҚТЖ» ҰК» АҚ бас ғимараты жанында компанияның Адами ресурстарды басқару департаменті мен Астанадағы трансфузиология орталығы бірлесіп Донор күнін өткізді.
Аталған департаменттің бас менеджері Талған Езгужановтың айтуынша, қан тапсыру арқылы қайырымдылық іс-шарасына теміржолшылар үнемі белсенді атсалысады. Сала мамандарының арасында «Құрметті донор» куәлігіне ие донорлар аз емес және олардың қатары артып келеді. Олардың бірқатары 15-20 жылдан бері тұрақты қан тапсырады. Бұған қатысу үшін әлеуетті донорларға 24 сағат ішінде майлы және сүтті тағамдар жемеу, 72 сағат бұрын дәрі ішпеу деген сынды бірқатар талап қойылады. Бұл жолы да 65 адамнан 51 адам жарамды деп танылып, қан тапсырды.
– Денсаулығына байланысты мұқтаж жандарға бір көмегім болар деп қан тапсырып жүргеніме 2 жылдай болды. Өзімнің денсаулығым өте жақсы, волейбол ойнап, спортпен шұғылданамын. Дұрыс тамақтанып, зиянды әдеттерден аулақ болуға тырысамын. Жылына 2 рет қан тапсырамын, – дейді компанияның «Біріктірілген жоспарлау дирекциясы» филиалының менеджері Меңдібек Зият.
Донор күні биыл ҚТЖ бас ғимаратында үшінші рет өткізіліп отыр. Орталық дәрігерлері теміржолшылар арасында донорлар қатары артып жатқанын ерекше атап өтті.