Жаңғыртылудан кейін жаңалық көп

Жаңалықтар

28.10.2016, 12:52

Оқуға 3 мин

Темір жолдың байланыс саласының соңғы жылдардағы жаңғыртылуынан кейін ескі құрылғылар заманауи түрлерімен алмастырылып, бұл қолайлы еңбек жағдайы мен өндірістік қауіпсіздікті нығайтуға, жалпы сала қызметінің тиімділігін арттыруға мүмкіндіктер ашуда. Солардың бірқатары Астана белгі беру және байланыс дистанциясында да жүзеге асырылып жатыр. Мекеменің бас инженері Мұхтарбай Битеміровтың айтуынша, соңғы 4 жылдағы басты өзгеріс мекемеге қарасты Дөңес постында бұрынғы механикалық жүйенің орнына ГАЦ-АРС ГДСС қондырылуы. Толығымен микропроцессорлық элементтерден тұратын жаңа жүйе арқылы орын алатын аудан көлемі азайып, бос орын аумағы артқан. Тағы бір артықшылығы, қауіпсіздік мәселесі жақсарып, жүйе автоматты түрде басқарылатын, жылдамдық реттеу автоматты түрде жүзеге асырылатын, адами фактор жойылатын болды. Сонымен қатар жүйе арқылы диагностика жасалып, хаттама да өздігінен жазылып тұрады. Ол хаттама бір ай бойына сақталады. Бас инженер осындай жетістіктерімен бөлісе келе, биылғы тәуелсіздіктің 25-ші жылындағы қол жеткізгендерін айтқанда, осы жылы бағыттама бұрмаларын басқаруға арналған 95 электр жетек алынатынын жеткізді. – Ұлттық компания мен «Alstom» компаниясы арасындағы қол қойылған Меморандум бойынша бұл компания бізге барлық темір жол саласына 10 мың электр жетек жасап шығаратын болды. Соның 436-сын біздің дистанция алу керек. Былтыр 128-н алып орнаттық. Биыл 95-і. Осылайша келесі жылдары да алып отырамыз. Ал енді бұл қондырғының не артықшылығы бар? Бұрынғы СПС-6 орнына салынатын жаңа электр жетек те қызмет көрсетілмейтін қондырғы. Яғни, оны электр монтерлер ашып, ақтарып, жөндеп жатпайды. Жабық дүние. Жарамдылығы 10 жылға жуық. Пойыздарды жолға салғанда, бағыттарын бұрғанда қажет етілетін құралдың тиімділігі зор, – дейді бас инженер. Бұл осы жылдың үлесіне тиер жаңалық болса, дистанцияның келер жылғы ең басты жаңалығы, 2017 жылы сәуір айынан бастап қондырылатын Эбилог-950 МПЦ болғалы отыр. Салынып жатқан Астананың жаңа вокзалы мен Астана–Қырқыншы станциялары аралығындағы техникалық парктегі байланыс жүйесіне орнатылатын Эбилог-950 бір орталықтан басқаруды қамтамасыз етеді. – Бізде бүгінде қызмет көрсету телімдерімізде 11 ЭЦ посты бар. Оның міндеті – станция жолдарындағы бағыттама бұрмалары, бағдаршамдар қызметін реттеу. Ал жаңа жүйе арқылы осы постылардың керек болмайды. 34 бағыттама бұрмасына 1 модульдік жаңа жүйе жеткілікті. Оны жаңа вокзал ғимаратындағы станция кезекшілері бақылап, басқарып отырмақ. Мұнда да артықшылықтары – автоматты түрде диагностика, хаттама жасалады, үздіксіз қоректену көзіне ие. Сонымен қатар орын алатын аумақ көлемінің азаюы, – дейді М. Битеміров. Дистанцияның қызмет көрсету телімі бойынша үш темір жол бағыты бар: Ерейментау, Ақкөл және Жалтыр бағыттары. 2008 жылдан бері осы үш бағыттағы белгі беру жүйесі микропроцессорлық диспетчерлік орталықтандырылуға көшірілген. Немон және ЮГ деп аталатын диспетчерлік орталықтандырылу жүйесіне қосылған. Жалпы мекеме бойынша 7 диспетчерлік шеңбер бар. Өткен ғасырдың ортасында құрылған мекемеде бүгінде жоғарыда аталған ауқымды жұмыстарда барлығы 333 адам еңбек етеді. Қызмет көрсету телімі 11,9 км бір жолды автоблокировка, 223,299 км екі жолды автоблокировка жолынан тұрады. 436 бағыттама бұрма, 11 ЭЦ посты бар. Осы аумақта биыл 5 қыркүйекте басталған күзгі комиссиялық байқау нәтижесінде 36 ескерту берілген. Бас инженер оның 29-ы бойынша кемшіліктер жойылғанын айтады. Ал қалғандарын орындауға қосымша қаражат қажет етіледі.

Жаңғыртылудан кейін жаңалық көп

Басқа да жаңалықтар

Қазақстан теміржолшысы газеті, №81 13 қазан 2026 жыл

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл