«Қазақстанның даму тарихы – менің тарихым» атты викториналық байқаудың жеңімпаздары анықталды
«Қазақстан теміржолшысы» газетінің тілшісі
Биыл қыркүйектің 20-29 аралығында «Қазақстан теміржолы» ҰК» АҚ-да «Қазақстанның даму тарихы – менің тарихым» атты викториналық байқау өткізілді. Арнайы байқау Қазақстан Тәуелсіздігінің 30 жылдығы және Құрметті теміржолшы, ҚР тұңғыш көлік министрі, қоғам қайраткері Нығметжан Есенғариннің 80 жылдығына орай ұйымдастырылған, деп хабарлайды Rail-news.kz. Викторина мақсаты – еліміздің даму тарихы мен тәуелсіздік құндылықтарын насихаттау. Оның шарты бойынша викторинаға қатысушы 25 сауалға жауап берді. Сайыс сұрақтарына жауап берген әрбір қатысушы аты-жөні мен телефон нөмірін және электронды поштасын жазып қалдырды. Викторинаға қатысушылар жауабы 20-26 қыркүйек аралығында жіберіліп, байқау комиссиясы ұсынылған жауаптарды екшеп, олардың ішінде дұрыс және ерте жауап бергендерді іріктеді. Ұйымдастырушылардың айтуынша, байқауға 220 адам қатысқан. Комиссия шешіміне сай I, II және III орындар анықталды. Сонымен ең дұрыс жауапты бірінші болып жеткізген «ҚТЖ» ҰК» АҚ» – «Астана темір жол вокзал кешені» филиалының технологиялық процесті ұйымдастыру бөлімінің бастығы Ғалия Нүскеева жеңімпаз болып танылса, екінші орынды Көп функционалды қызмет көрсету орталығынан персоналды дамыту тобының қызметкері Аягөз Темірова алды. Ал үшінші орынға Қарағанды магистральдық желілер бөлімшесінің қыз- меткері Сапар Жазыбаев лайық деп танылды. Сонымен қатар комиссия шешімімен ынталандыру сыйлықтарына «Қала маңы тасымалы» АҚ қызметкері Азамат Айтенов, «ҚТЖ» ҰК» АҚ» – «Астана темір жол вокзал кешені» филиалының қызметкері Ертужан Құлыбаев ие болды. Жеңімпаздардың барлығы дипломдар және бағалы сыйлықтармен марапатталады.