Халықаралық деңгейде өткен толаскез
Қызылорда облысы бойынша меншікті тілші
«ҚТЖ» ҰҚ» АҚ Магистральдық желі дирекциясына қарасты Қызылорда жол дистанциясының Түркістан – Шорнақ телімінде тұтас теміржол төсеміне тиімді тәсілмен жөндеу жүргізілді. Жөндеу жұмыстары аясында жол машиналарының көмегімен 2086 метр жолда темірбетон шпалдар мен металл бекіткіштер ауыстырылды.
Магистральдық жолдардың қауіпсіздігі мен ұзақ мерзімді пайдалануын қамтамасыз ету мақсатында қолға алынған жоба инфрақұрылымды жақсартудағы маңызды қадам болумен қатар, тамаша тәжірибе алмасу алаңына айналды. Өйткені жұмыс үдерісіне Қазақстан темір жолына қарасты құрылымдармен қатар көршілес Қырғыз темір жолының да өкілдері қатысты.
Күрделі жөндеу жұмыстары жаңа тиімді әдіс бойынша жабық аралықта жүргізілді. 36 сағаттық технологиялық «толаскез» барысында 2086 метр теміржол табаны толықтай жаңартылды. Жол шаруашылығындағы түрлі техникалар легі іске қосылып, Duomatic, ПРБ, ВПО, ШОМ, ДГС, RM-80, SMD-80, т.б. техникалар рет-ретімен жұмысқа жегілді.
Шорнақ – екі бөлімшенің шекарасы әрі пойызды басқару жүйесінің түйіскен нүктесі болғандықтан үлгілік нұсқада өткен күрделі жөндеуге Қызылорда, Алматы мен Шымкент бөлімшелерінің тиісті құрылымдары, жолшылар, ПЧМ Ағадыр, ПЧМ Шу, т.б. жол шаруашылығының өкілдері қатысты.
– ЦЗ Т.Алдыбергеновтің 02.12.2024 ж. №ЦЗ/225-И телеграфтық нұсқауына сәйкес желтоқсан айының 09-10 күндері Шорнақ – Түркістан учаскесінің тақ жолы бойындағы екі бөлімше учаскелерінің түйіскен жерінде 2 км рельс тіректерін ауыстыру үшін 36 сағаттық үлгілік нұсқадағы толаскез өткізу жоспарланған болатын. Бүгін жұмыс басталды. Кешенді машиналар жұмыс жасап жатыр. Біз қазір DUOMATIC машинасының екінші төсем жасау жұмысын қырғызстандық әріптестерімізбен бірге қарап бақылап тұрмыз. Барлық жұмыс технологиялық талапқа сай жүріп жатыр, жол машиналарының жұмысы өз тиімділігін көрсетуде, – деді Қызылорда магистральдық желі бөлімшесінің директоры Ербол Сәулебеков.
Күрделі жөндеудің бүкіл жұмыс процесін көзбен көріп, 24 вагонға тиелген 3840 темірбетонды шпал салынып, 2086 метр жолдың жаңарғанына біз де куә болып, алыстан ат терлетіп арнайы келген көршілес әріптестерді сөзге тарттық.
– Қазақстандық әріптестеріміздің күрделі жөндеуін көзбен көріп, тәжірибе алмасу үшін арнайы келдік. Мынадай техникалар бізде жоқ болғандықтан, олардың жұмысымен танысу, қазақ туғандарменен бірге толаскезге қатысу біз үшін үлкен мүмкіндік болды. Бізде түйіспесіз рельс ұзындығы 800 метр болса, сіздерде 30 шақырымға жетеді екен. Жолшылардың кәсібилігі өз алдына, барлық жұмысты техниканың күшімен жасау керемет екен, – деді «Кыргыз темир жолу» УК» ММ жол шаруашылығы филиалының бас инженері Талантбек Темирболатов.
Шорнақ – Түркістан станцияларының аралығында тақ жолдың 3085-3094 шақырымына дейінгі аралықтағы жол телімін жаңартқан күрделі жөндеу кестеге сай аяқталып, жоспарлы жұмыс толық көлемде орындалды. Халықаралық деңгейде өткен толаскез қазақстандық жолшылардың кәсіби біліктілігі мен жол техникаларының мінсіз жұмысын көрсетті.
Жалпы, телімде жоспар бойынша 10 км жолда темір бетон шпалдардарды темір металл бекітпелерімен қоса ауыстыру көзделген. Алдағы уақытта жұмыс әлі жалғасады.
