Бейнеу астық терминалы іске қосылды

Маңғыстау темір жолының ірі жүк жөнелтушісі Бейнеу астық терминалы қайта іске қосылды. Тәулігіне 320 тонна ұн мен 80 тонна кебек өндіре алатын терминал қайта жаңғыртудан кейін қуаттылығын арттыра түскен.

Маңғыстау теміржолымен өтетін жүктердің үлесінде өзіндік орны болған бұл нысан біраз жыл бұрын банкрот болып, 2018 жылдан бері жұмысы тұралап қалған еді. Бірер күн бұрын қайта іске қосылған терминалға алғашқы лекпен 15 шақты вагон астық түсірілді. Аталған жүк Бейнеу теміржолымен жеткізіліп, станциядан терминалдың кірме жолдарына берілді.

Жаңғыртудан кейін қуаттылығы күніне 400 тонна ұн және 240 тонна құрама жем беруге дейін ұлғайтылады деп болжанып отырған астық терминалының жұмысын қайта бастауын «Еуразия Транс Логистик» ЖШС мен «Каспий» әлеуметтік-кәсіпкерлік корпорациясы бірлесе жүзеге асырды. Өңірде орналасқан стратегиялық маңызды нысандардың бірі болған бұл терминалдың жалпы ауданы – 26 гектар. Оның өзінің кірме жолдарының ұзындығы – 8 шақырым. Нысан алғашқы өнімін шығарып та үлгерді. Терминал жұмысы тоқтап қалғалы Маңғыстаудағы мал азығы бірнеше есеге қымбаттаған, бұл бағыттағы экспорт та тоқтаған болатын. Кәсіпорынның жұмысы қызып тұрған кезінде Өзбекстан, Түркіменстан және Иран елдеріне жылына 1 млн тоннаға дейін ұн тасымалданған екен. Жұмысы жанданса, экспорт көлемі де артады деп күтілуде.  

Маңғыстау жүк тасымалы бөлімшесі Бейнеу станциясының бастығы Есет Хайруллиннің сөзіне сүйенсек, аталған терминал енді ғана жұмысын бастап жатқандықтан келіп-кетер жүк көрсеткіштері жағынан әлі толықтай жоспарлар жоқ.  

– Станция терминалмен арадағы келісім бойынша қажетті қызметтерін көрсетіп, бастапқы лекпен жеткен астық тиелген вагондарды кәсіпорынға жеткізіп беруді қамтамасыз етуде. Вагондар өз уақытымен терминалдың кірме жолдары және тұйықтарына беріліп, бүгінгі таңда кейбіреулері түсіріліп жатыр, – дейді станция басшысы.