Вагон қараушылар қырағылықты күшейтті

Бүйірлік рамалардың ақауы – вагон шаруашылығы қызметкерлерінің бас ауруына айналған тақырып. Ақауды дөп кезінде анықтап, апаттың алдын алуға бағытталған айлықтар жиі өтіп, вагон қараушылар қырағылықты бұрынғыдан да күшейткен.  

Маңғыстау вагон депосының вагон қараушылары өткен жылы алты автотіркегіш құрылысының сынғанын, төрт рет букс торабының жылжығанын, бүйірлік раманың біреуіндегі қауіпті бұзылысты анықтаған еді. Соның ішінде былтыр 18 қазанда басталған бүйірлік рамаларға назар аудару айлығы аясында табылған ақаулықтардың  біреуін вагон қараушы Нұрлыбек Құрбанбаев анықтаса, биылғы бүйірлік ақауды «Қозғалыс қауіпсіздігі үшін» белгісінің бірнеше рет иегері Жанарбек Якупбаевтың назарына іліккен.  

Маңғыстау станциясындағы вагон қараушылар биыл да бірнеше қауіпті ақауды тауып, қозғалыс қауіпсіздігін сақтауға үлес қосуда.  

– Менің ауысымымда сегіз жылдық еңбек тәжірибесі бар вагон қараушы Аманжол Абдрахманов сегізінші жолға тоқтаған 60802709 нөмірлі вагоннан ақау тапты. Вагон Түркіменстаннан Ресей бағытына кетіп бара жатқан. Ақау негізінен букс торабына жатады. Яғни подшипник бұзылған, сепаратор тұйықтағышы және ішкі сақина ернеуі де сынған, бүйірлік бекітуі бұзылған, тәрелке тығырықтың М20 бұрандамалары жұлынған екен. Мұндай ақаулықтармен вагонның қозғалысына мүлдем тыйым салынады. Дереу қажетті шарасы алынып, вагон Маңғыстау станциясындағы ағыту тұйығына жеткізілді,- дейді ауысым бастығы Ерлан Ереков.  

Маңғыстау станциясындағы ТҚКП тағы бір  вагон қараушысы Берік Дүйсенбаев жуырда түнгі ауысымда жүк пойызын күтіп алып, техникалық қызмет көрсету барысында құраманың соңындағы вагон доңғалақтарын тексеріп жүріп тосын дыбысты байқаған. Мұқият қарап, вагонның төртінші жұп доңғалағынан букстың сынғанын анықтайды.    

– Жолдан келген темір қызып келуі керек, бұл салқын жағдайда болды. Ұрып көрсем дыбысы жаңғырып кетті. Мұқият зер салсам лабиринтті сақинасы 20 миллиметрдей шығып тұр. Букстың бақылау қақпағын ашып қарағанда ішіндегі болты сынған, майы қарайып, басқа да кемшіліктері көрінді. Біраз жылдан бері осы жұмыста жүргендіктен темірді соққанда қандай дыбыс береді, қай бөлшек қалай тұрады, бәрін жаттап алғанбыз, – дейді 21 жылдық еңбек өтілі бар, бұған дейін бірнеше рет қозғалыс қауіпсіздігіне қосқан үлесі үшін арнайы сыйақы да алған, «Қозғалыс қауіпсіздігі үшін» белгісімен марапатталған вагон қараушы.