Теміржолда өрілген тағдыр

Қырық жылдан астам ғұмырын теміржолға арнаған маңғыстаулық Маралбек Нұрмағанбетов зейнет жасына жетті. Соңғы сегіз жыл түбек теміржолының қалпына келтіру пойызын басқарған оны әріптестері зор құрметпен зейнетке шығарып салды.

Атыраудың тумасы болса да түбектің төл перзентіндей болған кейіпкеріміз 2007 жылы Маңғыстау жол бөлімшесі ашылғанда шақыртумен өңірге қоныс аударып, бөлімшенің пойыз диспетчері – бөлімше кезекшісі қызметіне кіріскен. Содан бүгінге дейін Маңғыстау теміржолының өсіп-өркендеуі жолында бар күш жігерін сарп етіп келеді.  

1982 жылы Гурьев теміржол техникумын техник-жолшы мамандығы бойынша бітіріп, Гурьев жол дистанциясына үшінші разрядты жол жөндеуші болып жұмысқа тұрған ол кейін қозғалыс саласына бет бұрып, №16 бекетте, Бақсай, Туманный, №18 бекеті мен Қызылжар станцияларында кезекші, пойыз диспетчері болған. Маңғыстаудағы еңбек жолында да бөлімшенің пойыз диспетчері – бөлімше кезекшісі болып бірталай жыл қызмет атқарып, 2018 жылы өңірдегі Маңғыстау қалпына келтіру пойызының тұтқасын ұстайды. Күні бүгінге дейін мекемені абыроймен басқарып келді. «Құрметті теміржолшы» белгісінің иегері.  

Маңғыстау магистральды желі бөлімшесінде өткен салтанатты жиынға арысы Астана мен берісі Атыраудан арнайы келген қонақтар мерейтой иесін құттықтап, ұзақ жылғы адал да жемісті еңбегі үшін алғыс айтты. Олардың қатарында Магистральдық желі дирекциясы мемлекеттік емес өрт сөндіру қызметі және қалпына келтіру пойызы департаментінің директоры Қанат Исмайлов, Атырау жүк тасымалы бөлімшесінің директоры Аслан Базарғалиев, Маңғыстау жүк тасымалы бөлімшесінің директоры Нәжімеден Ғұбашов, Маңғыстау магистральдық желі бөлімшесінің директоры Ерназар Ізтұрғанов т.б. азаматтар жүрекжарды құттықтау тілектерін жеткізіп, мерейтой иесін Құрмет грамотасы мен «Қазақстан темір жолына - 120 жыл» медалімен марапаттап, бағалы естелік сыйлықтарын табыс етті.  

Әріптестері бірауыздан Маралбек ағамыздың саладағы еңбегіне жоғары баға берді. Оның туа бітті теміржолшы болып қалыптасып, қауіпсіздік қағидаттарын «Жеті жарғыдай» өмірлік ұстанымы етіп, бұлжытпай орындайтын қасиетін сөз етті.

Маралбек ағаның жары Рая Халикова да Құрметті теміржолшы атанған мықты маман екенін айтпай кете алмаймыз. Ұзақ жылдар Маңғыстау станциясында дөңес кезекшісі болып қызмет атқарады. Ал қос теміржолшыдан туған ұл – Самат Нәжімеденов Маңғыстау локомотив депосында машинист, оның жары бөлімшенің қаржы бөлімінде жұмыс істейді.  

− Теміржол менің тағдырыма, бүкіл өміріме, отбасыма айналды. Теміржолшы кәсібі бізді көп нәрсеге үйретті, тәриеледі, шыңдады, өсірді, жеткізді, – дейді тұтас бір теміржолшылар отбасының алтын діңгегіне айналған Маралбек Нұрмағанбетов.