Бейнеудегі машинистердің демалыс үйі жаңа кейіпке енді
Маңғыстау облысы бойынша меншікті тілші
Маңғыстау локомотив пайдалану депосында машинистер үшін барлық қолайлы жағдай жасалған. Локомотив бригадаларына арналған төрт демалыс үйі бар. Биыл осыдан қырық жыл бұрын салынып пайдалануға берілген Бейнеудегі демалыс үйі күрделі жөндеуден өткізілді.
Жаңғыртудан соң бес жұлдызды болмаса да кішігірім қонақүйге ұқсап құлпырып шыға келген демалыс үйі жақында қайта ашылып, машинистер игілігіне берілді.
Екі қабатты демалыс үйін бұрынғысымен салыстыруға да келмейді, айырмашылық жер мен көктей. Іші мен сырты толықтай жаңартылған. Локомотившілердің бос уақытында дұрыс демалып, жайлы да жағымды атмосферада ас-суын ішіп, физикалық һәм моральдық жағынан жақсы тынығуына барлық мүмкіндік жасалған. Бөлмелер жаңа жиһазбен жабдықталған. Асхана гарнитуры, мұздатқыш, электрлі плита, кір жуғыш машина, үтік, компьютер, кереует, киім шкафы мен тумбасы, үстел, кондиционер сияқты қажеттіліктермен толық қамтылған.
Нысанда жалпы 16 бөлме, 34 орын бар. Онда тек қана маңғыстаулық бригада емес, Мақат депосынан келетін машинистер бригадасы да демалуы қарастырылған.
Демалыс үйін күрделі жөндеуден кейін пайдалануға беру рәсіміне Астанадан «ҚТЖ-Жүк тасымалы» ЖШС Локомотив шаруашылығы бойынша бас директордың орынбасары Асан Үмбетов арнайы келіп, деполықтар қуанышына ортақтасты. Маңғыстау локомотив пайдалану депосының бастығы Ерболат Құсниязов ғимарат құрылысын сапалы бітірген құрылысшыларға алғыс айтты. «Жақсыны көрмек үшін» демекші, Бейнеу айналым депосының ұжымы, Мақат локомотив депосы басшылығы, еңбек ардагерлері, жергілікті билік өкілдері, т.т. демалыс үйінің жаңа көркіне көзайым болғандар ризашылықтарын білдірді.
Жиын барысында күрделі жөндеуді жүргізген «Нұрболат» ЖШС өкілдерінің атына да жылы сөздер айтылып, құрылысқа атсалысқандар Алғыс хатпен марапатталды. Аталған мекемемен осы жылдың ақпан айында келісімшарт жасалып, күрделі жөндеу жұмыстары басталған еді. Құрылыс уақытылы аяқталып, маусым айының аяғында толық бітіріп беріп отыр.
Орайы келгенде атап кетсек, Маңғыстау локомотив пайдалану депосында бұдан басқа тағы да үш станцияда локомотив бригадаларының демалыс үйі қызмет көрсетеді. Олар Жаңаөзен, СайӨтес пен Маңғыстау станцияларында орналасқан.
