Маңғыстау теміржолшыларына біржолғы сыйақы берілді
Маңғыстау облысы бойынша меншікті тілші
Ұлттық компания көлемінде сала қызметкерлерінің еңбегін ынталандырып, кәсіби тұрақтылығын арттыру, моральдық қолдау мақсатында еңбек еткен жылдарына орай біржолғы ақшалай сыйақы енгізілгені белгілі. Маңғыстау жол дистанциясының жұмысшылары осы қаржылай марапатқа қол жеткізіп, теміржолшылардың өз кәсібіне деген мақтанышы, құрметі мен қызығушылығы арта түскені анық.
Жол дистанциясында еңбек ететін 465 адамның сексен пайыздан астамы – он жылдан кем емес тұрақты еңбек етіп жатқан жолшылар. Атап айтсақ, 357 адамға сыйақы тағайындалған. Таратып айтсақ, дистанцияда отыз жылдан астам еңбек еткен 47 адам 300 мың теңге мен «Теміржол саласында 30 жыл мінсіз қызметі үшін» алтын белгіге ие болған. Жиырма және одан көп еңбек еткен 93 жолшы 200 мың теңге мен «Теміржол саласында 20 жыл мінсіз қызметі үшін» күміс белгісін, ал 217 теміржолшы 100 мың теңге мен «Теміржол саласында 10 жыл мінсіз қызметі үшін» қола белгісін алды.
Талай жылғы еңбегінің жемісін көріп, қаржылай марапат пен алтын төсбелгіге ие болғандардың бірі – майталман жолшы Қорғанбай Бекенаев. Жол дистанциясына қырық жылдан астам өмірін сарп еткен ол мұндай игілікті бастама жастарға жігер беріп, кәсібіне адалдығы мен махаббатын арттыруға әсер ететінін айтады. Еңбектің ешқашан жерде қалмайтынын тілге тиек еткен ол жол жөндеушіден бастаған еңбек жолында қаншама қиындықты еңсере жүріп жетістіктерге жеткенін, соның нәтижесінде бүгінде «Құрметті теміржолшы» атанып отырғанын сөз етті.
Қорғанбай Бекенаев 1981 жылы небәрі 17 жасында №15 бекетке жол жөндеуші болып келіпті. Жасына байланысты қысқа сағаттық жұмыс тәртібінен бастаған бозбала теміржолда жүріп кәмелет жасына толып, әскери борышын өтеуге де осы жерден аттаныпты. Әскерден келіп жұмысын қайта жалғастырып, жол жөндеушіден жол шебері, бригадир, шебер, телім бастығы жұмыстарында өзін шыңдаған. Бүгінде бірнеше бекет пен станция аралығын қамтитын №2 учаскеде телім бастығының орынбасары. Түбек теміржолының 290-380 шақырым арасындағы №16, 15, 14 бекет, Шетпе ст., №13 бекеттердің аралығындағы жол күтімін жасауды қамтамасыз етіп жүрген жұмысшыларды басқарып отыр. Күні кешеге дейін №15 бекетте тұрды. Құдай қосқан қосағы екеуі бірге еңбек етіп, маңдай тер, табан ақымен тапқан табыстарымен бес баланы жеткізіп, аяққа тұрғызды. Кенже ұлын қарашаңырақта қалдырып, бірнеше жыл бұрын ғана бекеттің басынан ауылға көшті. Қазір қарашаңырақтағы ұлы сол бекетте ШЧ бағытында жұмыс істейді.
Жалпы, Маңғыстау жол дистанциясында 30-40 жыл еңбек өтілі бар майталмандар аз емес. Дистанция бастығының орынбасары Жолдас Жетібай – 37 жыл, ал инженер-технолог Сәрсен Мүсірханов 42 жыл тер төгіп келеді. Жолшылар ұжымы адал еңбек өтеуіндей болған сыйақы жүйесінің қалпына келтірілгеніне дән риза.