Семей жол дистанциясында еңбек жағдайы жақсаруда

Семей жол дистанциясында жазғы жол жөндеу жұмыстары қызу жүргізілуде. Сәйкесінше теміржолшылар үшін еңбекке қолайлы жағдай жасау, еңбек және өндірістік қауіпсіздікті сақтау шаралары алдыңғы орынға шықты.

Қазіргі күні Жаңа-Семей – Дегелең, Семей – Локоть бағытына қызмет көрсететін ПЧ-39 мекемесінде 218 адам зиянды әрі қауіпті еңбек жағдайында қызмет етуде. Оның ішінде 50 теміржолшы зиянды деп есептелетін жағдайда еңбек етеді. Барлығы да толық көлемде сүт өнімдерімен қамтылған.

Сонымен қатар дистанция қызметкерлері еңбек ететін желі бойында екінші тоқсанда қосымша тексеру шаралары жүргізіліп, тұрмыстық қажеттіліктер түгенделген. Арнайы гардеробтар, шкафтар әзірленіп, керек-жарақтар жүз пайыз қамтамасыз етіліпті. Дегенмен теміржолшылар сұранысына орай жаз мезгілінде әлі де атқарылуы тиіс шаралар бар. Мәселен, желі бойындағы душ кабиналарының санын 15-ке жеткізу керек.  

Еңбек және өндірістік қауіпсіздік мәселелері бойынша тек екінші тоқсанның өзінде ғана дистанция басшысы Рахат Ботаспаев және бас инженер Мырзабек Керейбаевтың қатысуымен 38 арнайы тексеру  жүргізілген. Өндірістік телімдер, цехтар да толық назарға алынып, теміржолшылар игілігі үшін 56 мәселе қағазға тіркелген.  

Жолшылар үшін жылыну үйшіктерінің маңызы зор. Бұл орайда Дегелең, Шаған,  Белағаш, Талды, Ауыл, Дүйсекен, Семей және Жалпақ станцияларында қосымша жылыну пункттері салынып, мұндай нысандар саны 25-ке жеткізіліпті.

Жыл басынан бері ешкім тәртіптік жазаға тартылмаған. Қызмет барысы техникалық нормаларға сай, арнайы нұсқау аясында өтуде. Соңғы үш ай ішінде 12 техникалық дәріс өткізіліпті. Ал арнайы аттестациялаудан 331 теміржолшы өтіп, еңбекті қорғау бойынша білімдерін дәлелдеген.

– Жыл басынан бергі ең үлкен жетістігіміз сол, бірде-бір өндірістік жарақаттануға жол берген жоқпыз. Сол тәрізді жүрек-қан тамыры ауруларының алдын алу бойынша да кешенді түрде жұмыстар жүргізілуде, – дейді  ПЧ-39 мекемесінің еңбекті қорғаудың жетекші инженері Гүлзавира Елемесова.

Айта кетер жайт, еңбекті қорғау шараларын ұйымдастыруда жыл басынан бері кешенді жоспар жасалынып, қажетті көлемде қаражат бөлінген болатын. Әр тоқсан бойынша белгіленген қаржы толық игерілуде.