Кәсіби мерекеге тарту

Бершүгір жол дистанциясы қызметкерлеріне кәсіби мерекеге орай тамаша тарту жасалды. Салауатты өмір салтын қалыптастыруды әдетке айналдырған теміржолшылар үшін арнайы спорт кешені пайдалануға берілді.

Спорт кешенінің ашылу салтанатына «ҚТЖ» ҰК» АҚ Ақтөбе магистральдық желі бөлімшесі филиалының директоры Серғали Жайлаубай, «Батыс» филиалы кәсіподақ ұйымының төрағасы Ғабит Садықов арнайы барып қатысып, жолшылар қуанышына ортақтасты. Теміржолшы ардагерлер, аудандық мәслихат депутаттары құттықтау сөз сөйледі.  

«Теміржолшылар үшін спорт кешендерін салу, пайдалануға беру бізде тұрақты дәстүрге айналған. Бұл жалғыз жолшылар игілігіне қызмет етпейді, мұнда Бершүгір станциясының барлық теміржолшысы келіп, жаттығатын болады деп ойлаймын. Іші жайлы, қолайлы, заманауи талапқа сай кешеннің игілігін көріңіздер», – деді Серғали Жайлаубай.  

Аудан басшылары жұмысшы мамандықтар жылында теміржолшыларға жасалып жатқан жағдайды оң бағалады. Жерлестерінің атынан теміржол басшылығы мен кәсіподағына алғыс айтты. «Бүгін үлкен еңбектің жемісін көріп тұрмыз. Ашылып жатқан спорт кешені ел дамуына үлес қосып жүрген теміржолшылар игілігі үшін жасалып жатыр. Мереке құтты болсын, әріптестер!», – деді «Батыс» филиалы кәсіподақ ұйымының төрағасы Ғабит Садықов.  

Спорт кешенінің ашылу салтанатына орай жергілікті теміржолшылар арасында кіші футболдан жарыс ұйымдастырылып, жеңімпаздар арнайы марапатталды.