Мерекеге лайық жетістік: Қызылорда станциясы үздік нәтиже көрсетті

Қызылорда станциясының ұжымы биылғы төл мерекелерін табыспен қарсы алды. Негізгі өндірістік көрсеткіштер толық және жүз пайыздан асыра орындалған.

Есептік кезеңде маневрлік және негізгі пойыз қозғалысында қозғалыс қауіпсіздігін бұзуға қатысты ешқандай оқиға орын алмаған. вагондардың бүлінуі немесе техникалық зақымдануы тіркелмеген. Қозғалыс қауіпсіздігін сақтауды арттыру көрсеткіштері кемшіліксіз орындалуда. Станция аумағында жүк және жолаушы пойыздарының қозғалысын тұрақты бақылауда ұстайтын олардың пойыздарды қабылдау және жөнелтуі үнемі бекітілген технологиялық регламентке сай жүргізіледі.

Станцияда пойыздар қозғалысын реттейтін құрылғылардың электрмен қамтамасыз етілуі, автоматтандырылған жүйелер – сигнал беру мен байланыс құрылғылары да, вагондардың сапарға дайындау қызметі де мінсіз жұмыс істеуде. Биыл бұл жүйелерде бірде-бір ақау орын алған жоқ.

«Осынау өндірістік жұмыс көрсеткіштерінің орындалуында әрбір теміржолшының маңдай тер, табан ақысы жатыр. Олардың әрқайсысының күнделікті қызметі көрсеткіштің еселенуіне қосылған үлес» деген станция бастығы Қайрат Жанкелдіұлы бірқатар теміржолшылардың есімін ерекше атап өткен еді. Олар станциядағы қозғалысқа жауапты маневр диспетчері Ғалым Әбіш пен станция кезекшісі Қуаныш Бегалиев, кезекші жанындағы оператор Күлайша Жүгінісова, пойыз құрастырушы Ерлан Жақып, тауар кассирі Жарқынай Тастыбаева, аға жүк қабылдап-тапсырушы Мәдина Тұяқбаева, жүк қабылдап-тапсырушы Мира Филипова, тасымал құжаттарын өңдеуші Айнагүл Лайс пен техконтор операторы Мейрамгүл Ерімбетова сынды нағыз өз ісінің кәсіби мамандары.  Қызылорда станциясының жетістігін еселей түсуге лайықты үлес қосып отырған майталмандар.