Сай-Өтес станциясында «Қызметтік қару» жедел алдын алу шарасы өтті

Суық қару көрсе денесі дірілдеп, жүрегі дүрсілдемейтін адам кемде кем болса керек. Әсіресе ату қаруын ұстау кез келгенге «бұйырмаған бақыт» болғандықтан оны алып жүруге құқы бар қызмет өкілдерінің пайдалану және сақтау, алып жүру ережесін бұлжытпай орындауы қажет. Сондықтан жақында Маңғыстау облысындағы Сайөтес станциясында желілік полиция бөлімшесінің қызмет ету аумағында «Қызметтік қару» жедел алдын алу іс-шарасы ұйымдастырылды.  

«Қызметтік қару» жедел профилактикалық жұмыстары Көліктегі полиция департаментінің жоспарына сәйкес 11-15 тамыз аралығында өткізілді. Сай-Өтес станциясындағы алдын алу жұмыстары барысында станциясындағы ӘТЖК-нің күзетшілеріне және Сай-Өтес станциясына жүк пойыздарын күзетіп келетін серіктеу жасақтарына тексеру жүргізілген. Нәтижесінде қызметтік қаруды сақтау, алып жүру және пайдалану тәртібін бұзғаны үшін ҚР ӘҚБтК-нің 484 бабы 1 бөлігіне сәйкес  ӘТЖК-нің бір күзетшісі әкімшілік шараға тартылған. Оған он айлық есептік көрсеткіш мөлшерінде айыппұл салынған.  

Бұл жөнінде хабарлаған Сай-Өтес станциясындағы желілік полиция бөлімшесінің басшысы Нұрлыбек Рахметовтің айтуынша, қызметтік қару негізінде ӘТЖК-нің барлық күзетшісіне беріледі екен. Тек кейбір себептер бойынша, яғни қаруды сақтау қоймасы болмаған жағдайда да ол жердегі күзетшілерге қару берілмеуі мүмкін.  Өйткені қаруды сақтау ережесін ұстану маңызды, дейді ол. Оны қолдану бойынша күзетшілер жұмысқа орналасар алдында арнайы емтихан тапсыруы тиіс. Содан соң ғана олардың атына қару бекітілетін көрінеді.    

- Жедел алдын-алу профилактикалық іс-шарасының негізгі мақсаты — мекемелерге бекітілген қызметтік қарудың сақталуын, пайдалануын, алып жүру қағидаларының бұзылуына жол бермеу және алдын алу. Осыған сәйкес біз Сай-Өтестегі ӘТЖК-нің күзетшілеріне, станцияға жүк пойыздарын күзетіп келетін серіктеу жасақтарына қызметтік қаруды қолдану кезіндегі қауіпсіздік шаралары туралы, алып жүру және сақтау қағидалары туралы түсіндіру жұмыстарын жүргіздік.  Қаруға қашан да сақтықпен қарап, оны қолдануға құқы бар адамдар маңызды ережелерді ұмытпағаны абзал», - дейді Сай-Өтес станциясындағы желілік полиция бөлімшесінің басшысы Нұрлыбек Рахметов.