Қалпына келтіру пойызы – теміржол жұмыстарының сенімді серігі
Маңғыстау облысы бойынша меншікті тілші
Жыл басынан бері Маңғыстау темір жолында қалпына келтіруді қажет ететін апаттық жайттар тіркелмеген. Яғни бұл тұрғыдан қалпына келтіру пойызының қызметі қолданылмаған. Десе де, ҚКП қызметкерлері мен техникасы қарап отырған жоқ. Теміржол мекемелеріндегі біраз шаруаны атқаруға қатысқан.
Мекеме 26 рет келісімшарт бойынша түрлі станция-бекеттерге барып, әртүрлі жұмыстарды орындаған. Шетпе, Сайөтес, Маңғыстау, Қарақия, Жетібай станциялары мен №9, 15, 16 бекеттердің басында теміржол құрылысының қажетті жабдықтарын түсіру, ауыстыру, орнату, жүктеу сынды жұмыстарды істеген. Тарқатып айтар болсақ, Сайөтес станциясында теміржол үстімен өтетін көпірдің астын 30 сантиметрге көтеріп биіктеткен. Маңғыстау жол дистанциясына келген техниканы түсіріп, жөндеу жүріп жатқан телімдерінде бағыттамалық бұрмаларды ауыстыруға, темірбетонды шпалдарды вагоннан түсіруге қатысқан.
Маңғыстау станциясында бірнеше рет бағыттамалық бұрманы аударып, ағаш шпалдарын түсірген. Шетпе станциясында да осы істі атқарып, келген модульдік үйшікті орналастыруға көмектескен. Қалпына келтіру пойызының техникалары вокзал шаруашылығына да қолғабыс еткен. Маңғыстау вокзалына келген брусчаткаларды Шымкентке қарай тиеп жөнелтуге атсалысқан. Басқа да бекет пен станцияларда шпал түсіру, бұрманы салу, аудару жұмыстарын жүргізген.
– Қалпына келтіру пойызының қызметкерлері мен техникасы ай сайын келісімшарт негізінде атқаратын бірнеше жұмысқа шығады, әр жерде әртүрлі шаруаны атқарады. Одан басқа өзімізді сынап, жетілдіру мақсатында ұйымдастырылатын техникалық сабақтар да болады.
Соңғы рет маусым айында кранның қатысуымен жоспардан тыс техникалық сабақ жүргіздік. Техникаларымызды уақытылы тексеруден өткіздік.
Биыл бірнеше техника деполық және техникалық қызмет көрсетуден өтті. Қазір бізде екі кран, үш трактор, бір тартқыш техника (тягач) бар. Екі ескі вагонымызды жарамдылық мерзімі бітуіне орай ҚТЖ компаниясына қайта тапсырдық. Орнына қолданыста болған басқа вагон алдық. Бір вагонымыз Көкшетауда деполық жөндеуден, тракторымыз, ЕДК-1000/2 кранымыз жергілікті техникалық қызмет көрсетуден өткізілді. Тағы екі кранымызды Қандыағаштан келген ЖШС арнайы тексеріп, 2030 жылға дейін жұмысқа жарамды деген қорытындысын беріп кетті.
Қазір мекеменің сырты жаңартылып, алдына брусчатка төселіп жатыр. Бокстардың да бірінің ішіне кафель жабыстырылып, іштері тегістеліп, сыланды, – дейді Маңғыстау қалпына келтіру пойызының бастығы Ербол Мүсірханов.