Сапалық көрсеткіштер орындалды

Қызылорда ЖТ бөлімшесінің солтүстігіндегі басты бекеттердің бірі – Арал теңізі станциясы. Шіліңгір шілденің аптап ыстығы мен аңызақ желі теміржолшылардың үйреншікті күйбең тірлігіне қолайсыздық тудырғанымен, аралдық теміржолшылар кәсіби міндеттерін абыроймен атқарып шығуға атсалысты.

Жүк тиеу және түсіру жоспары меже үдесінен шықпаса да, сапалық көрсеткіштер орындалған. Биылғы жылдың шілдесінде станция бойынша жүк тиеу жоспарының орындалуы 72% құрады. Жоспарланған 921 вагонның орнына 661 вагон, яғни 43 895 тонна жүк тиелген. Тәуліктік жоспар29,71 вагон болса, нақты орындалу- 21,32 вагонмен нәтижеленіпті. Жүк тиеу көлемінің өткен жылмен салыстырғанда 17 пайызға төмендеуі теміржолшылар үшін сын сәт болса да, статикалық жүктеме көрсеткіші тұрақты сақталған. Бір вагонға шаққанда жоспарланған 66,54 тоннаның орнына 66,40 тонна жүктеліп жоспар 100 пайыз орындалған.  

«Жүк көлемінің азаюына қарамастан, біз сапа мен тиімділікті сақтап қалдық. Бұл – ұжымның үйлесімді жұмысының нәтижесі. Станциядағы жүк түсіру жұмыстарында өткен жылмен салыстырғанда өсім бар. Жолаушылар мен жүк пойыздарының қозғалысы тұрақты бақылауға алынған. Пойыздарды бекетке қабылдау және жөнелту үнемі бекітілген технологиялық регламентке сай жүргізіледі. Жолаушылар мен жүк пойыздарының кестеге сай қозғалысы сақталып, вагондарды тиеу мен түсіру секілді өндірістік бағыттар жоғары деңгейде орындалуда, – дейді станция бастығының логистика жөніндегі орынбасары Наурызбек Жұмабаев.  

Жүк түсіру бойынша 400 вагонның орнына 349 вагоннан жүк түсіріліп, жоспар 87,25 пайызға орындалыпты. Десек те, жүк түсіру көлемінің былтырғы кезеңмен салыстырғанда 45 пайызға артып, вагон айналымының жандана түскені байқалады. Шілде айында бір жүк операциясына кететін орташа тұрып қалу уақыты 13 сағаттың орнына 12,5 сағатты құрап, жоспар 104% орындалған.  

Бекеттің тәжірибелі пойыз құрастырушысы Болатбек Киікбаев пен жүк қабылдап-тапсырушы Ляззат Қайырлаева вагон айналымын жеделдету бағытында белсенді жұмыс істеп, әр жүктің уақтылы қабылданып, жөнелтілуін қамтамасыз етіп отыр. Тасымалдау құжаттарын өңдеу операторы Рахымжан Махамбетов пен тауар кассирі Эльмира Боранқұлова АСОУП жүйесіне ақпаратты уақтылы, нақты және сапалы енгізіп, пойыз қозғалысы мен жүк тасымалының тиімділігін арттыруға үлес қосып келеді.