Шиелі вокзалы тарихи келбетін сақтай отырып жаңғыртылуда

Республика бойынша қайта жаңартылып жатқан жүзден астам вокзалдың қатарында Шиелі вокзалы да бар. Орынбор-Ташкент теміржолының құрылысы басталған 1904 жылы салынып, ғасырдан астам тарихтың куәсі болған бұл ғимарат қазақ даласында салынған алғашқы теміржол нысандарының бірі.

Соңғы рет 2012 жылы күрделі жөндеуден өткен ғимарат бүгінгі күні тәулігіне 13 жұп пойызды қабылдап, орта есеппен 250-300 жолаушыға қызмет көрсетіп келеді. Бұл көрсеткіш аудан үшін айтарлықтай маңызды, себебі жолаушылардың басым бөлігі өңірден облыс орталығына және көршілес аймақтарға сапар шегеді.  

Жуырда облыс әкімі Нұрлыбек Нәлібаев бастаған бір топ Парламент депутаттары Шиелі вокзалындағы құрылыс жұмыстарының барысымен танысты. Бұл жолғы жөндеудің ерекшелігі – ғимараттың тарихи сәулеттік келбеті толықтай сақталып, заманауи талаптарға сай жаңартылуы дер едік.  

«Дәнекер» ЖШС мердігер компаниясы ғимараттың ішкі және қасбеттік қаптау жұмыстарын жүргізуде. Бұған дейін аудан әкімдігі вокзал аумағында қосымша жұмыстар атқарып, жолаушылар платформасына қақпа орнатқан, ескі су мұнарасын қалпына келтірген, сондай-ақ жарық шамдар мен орындықтар қойылған. Бұл өз кезегінде сапарға шыққан жолаушылардың жайлылығын арттыра түсті.  

Жалпы, республика көлемінде 100 вокзалға күрделі жөндеу жүргізу жобасы аясында Қызылорда өңірінде 10 вокзалдар жаңғыртылуда. Бұл бір мезгілде әлеуметтік, экономикалық және мәдени маңызы бар жоба болып отыр.  

– Бұған дейін Қызылорда вокзалы жөндеуден өткізіліп пайдалануға берілген болатын. Бүгінде жүргізіліп жатқан вокзалдардың құрылыс жұмыстары да жоспарға сәйкес биыл аяқталып, пайдалануға беріледі. Қазіргі таңда жөндеуден өткізіліп жатқан Сексеуіл, Арал теңізі, Қазалы, Жосалы, Төретам, Шиелі, Жаңақорған вокзалдарының Тереңөзек, Жалағаш Талап станцияларындағы жолаушыларға қызмет көрсету пунктеріндегі тарихи бейнесі сақталып, бастапқы архитектуралық құндылықтары жоғалмайды. Дегенмен, Шиелі сынды көне вокзалдардың шырайын кіргізетін жаңарту жүріп жатыр. Аймақ басшысы бастаған топ бүгін Шиелі вокзалындағы құрылыс барысын қарап шығып бірқатар тапсырмалар берді,– деді Қызылорда магистральдық желі бөлімшесінің вокзал шаруашылығы жөніндегі орынбасары Нұрлан Бимұратов.