Экочеллендж жалғасып жатыр

Қызылорда магистральдық желі бөлімшесінің директоры Ербол Саулебеков бастаған ұжым экочелленджді Ақтөбе өңірінің теміржол- шыларынан (НЖС-11) қабыл алып, облыс бойынша кең көлемді тазалық пен көгалдандыру жұмыстарын жүргізді.

Қала іргесіндегі Қызылорда – Белкөл станциялары аралығының тазалығы мен абаттандырылуы жай ғана шаруашылық шара емес, облыс орталығына кіреберістегі экологиялық келбеттің кезекті бір таза қалыпқа енуі еді. Осы учаскеде ПЧ, ШЧ, ЭЧ, ВП және ПП дистанциялары бірігіп, 1890 түп ағаш көшетін отырғызды. Бұл – мыңдаған отбасының болашақ ұрпағына тарту етер тынысы, көлеңкесі, сұлулығы бар жасыл мұра.  

Әріптестерінен экочелленджді қабылдаған Қызылорда жол дистанциясы да 500 түп ағаш отырғызды. Бір тал – бір тыныс. Ал мыңдаған ағаш – келешекке жасалған инвестиция.  

– Темір жол – тек қатынас жолы емес, ол өмір арнасы. Ал осы жол бойын жасыл желекпен көмкеру – табиғатпен үндестікте өмір сүрудің бір көрінісі. Темірдей тәртіппен жұмыс істейтін теміржолшылардың табиғатқа деген жанашырлығы бір жолғы акцияда көрініс таппайды, бұл – дәстүрлі шара, – деді Ербол Саулебеков.  

Әрі қарай Қызылорда белгі беру және байланыс дистанциясы ұжымы «Таза Қазақстан» экологиялық акциясы аясында Қызылорда жол дистанциясы ұжымынан эстафетаны қабыл алып, аумақты абаттандыру және көгалдандыру жұмыстарына өз үлесін қосты. Нәтижесінде 500 түп ағаш көшеті отырғызылды. Экочеллендж осылай тоқтаусыз жалғасып жатыр.