«Таза Қазақстан» челленджі жалғасып жатыр
Маңғыстау облысы бойынша меншікті тілші
«Таза Қазақстан» республикалық экологиялық акциясы аясында Маңғыстау магистральдық желі бөлімшесінің ұжымы өткен апта соңында сенбілікке шықты.
Алматы магистральдық желі бөлімшесінен «Таза Қазақстан» челленджін қабылдаған олар бір кісідей жұмылып, айналаны абаттандыруға атсалысты.
Филиал директоры Ерназар Ізтұрғановтан бастап бөлімше мен оған қарасты түрлі мекеме жұмысшылары акция барысында көгалдандыруға баса мән берді. Олар Маңғыстау қалпына келтіру пойызы мемемесінен Маңғыстау жол дистанциясының теміржол өткеліне дейінгі тас жолдың қос қапталына жас шыбықтар мен ағаштар екті.
– Түбек табиғатының өзіне тән ерекшелігі мен қиындықтары болғандықтан, өңірдің құрғақ және желді климатына бейім деп айлант ағашы таңдалды, – дейді қолына күрек алып жас ағашқа орын қазып жатқан бөлімшенің жетекші инженер-экологы Фариза Бекболсынова.
Мұндай акция бөлімшенің алыс-жақындағы барлық мекемелерінде жалғасып, сол күні жалпы есеппен түбектегі жасыл желектің саны 2179 данаға артты. Игілікті іс-шараға ПЧ Бейнеу, ЭЧ Маңғыстау, ШЧ Маңғыстау, ПЧ Маңғыстау, ВП Бейнеу, ПП Маңғыстау, ПП Бейнеу және ДС қызметкерлері белсенді қатысты.
Маңғыстаулықтар экологиялық челлендж эстафетасын әрі қарай Шымкент магистральдық желі бөлімшесіне жолдады.