Елдік пен еңбек мерекесі
Қызылорда облысы бойынша меншікті тілші
Қызылорда өңірінің теміржолшылары Республика күні мерекесін айрықша көтеріңкі көңіл-күймен, шынайы патриоттық рухпен қарсы алды. Егемен елдің еңселі мерекесіне орай аймақтың барлық салалық мекемелерінде салтанатты жиындар өтіп, теміржолшылардың табанды еңбегі мен ел дамуына қосқан үлесі лайықты бағаланды.
Халқымыздың мемлекетшілдігін, елдік рухы мен бірлігін айшықтайтын мерекеге орай салтанатты шара «AMANAT» партиясының қалалық филиалына қарасты «Магистральды желі» бастауыш партия ұйымында да ұйымдастырылды. Шараға бөлімше директорының міндетін атқарушы Ербол Оңғарбаев жетекшілік етіп, ел мүддесі жолында адал еңбек етіп жүрген қызметкерлерге алғысын білдірді.
– Республика күні – әр азаматтың еркіндігі мен ел дамуына қосқан үлесінің нышаны. Баршаңызды Республика күнімен шын жүректен құттықтаймын! Ел бірлігі мен ынтымағы, еңбектегі табыс пен толағай жетістік әрдайым серігіңіз болсын. Тәуелсіз еліміздің абыройы асқақтай берсін! – деді Ербол Кажденұлы өз сөзінде.
Мерекелік жиында сала үздіктері мен еңбек майталмандары марапат төрінен көрінді. Қызылорда электрмен жабдықтау дистанциясының аға электромеханигі Нұрлан Саттарұлы «Адал еңбегі үшін» медалімен, ал Қызылорда белгі беру және байланыс дистанциясының электромеханигі Мақсат Өмірзақов «Үздік байланысшы» медалімен марапатталды. Сондай-ақ облыстық деңгейде өткен марапаттау рәсімінде шебер Ғалымжан Ахметов Қызылорда облысы әкімінің алғыс хатымен марапатталды.
Бұдан бөлек, кәсіподақ ұйымының ұйытқы болуымен Қызылорда магистральдық желі бөлімшесіне қарасты мекемелердің үздік қызметкерлеріне де құрмет көрсетілді. Бөлімше басшылығы атынан әр мекемеден үш теміржолшыға Мадақтама қағазы мен бағалы сыйлық табысталды.
– Республика күніне орай ұйымдастырылған шара теміржолшылардың рухын көтеріп, ел мен еңбекке деген сүйіспеншілігін арттырды. Әрбір марапат – тек еңбек адамының жетістігі ғана емес, бүкіл саланың мерейі. Біз теміржолшылардың еңбегін елеп-ескеріп, олардың абыройын асқақтатуға әрдайым дайынбыз, – дейді «Қазкөліккәсіп» ҚБ филиалының төрағасы Бауыржан Ахметов.