Республика күніне тарту: Болашақ станциясында ашық сахна салынды

Маңғыстау темір жолына қарасты Болашақ станциясының тұрғындары үшін Республика күні жағымды жаңалықпен келді. Мемлекеттік мерекеге орай ауылда ашық сахнаның тұсауы кесілді.

Ауыл орталығынан су жаңа сахна салынып, халықтың игілігіне берілді. Ашық аспан астындағы бұл сахнаның орналасқан аумағы кең. Ол үшін ауылдың жарық, ыңғайлы жерінен жалпы ауданы 1000 шаршы метрлік орын бөлініп, өрнекті тас төселіп, айналасы қоршалған. Атшаптырым аумақтың ортасында темірден сахна орнатылған.  

– Ауыл басшылығынан осындай мерекелік тарту алып, жас-кәрі бәріміз мәз-мейрам болып жатырмыз. Бұрын мерекелік іс-шараларды қайда бос орын бар, сол жерде, вокзалдың не басқа мекеменің алдында өткізетінбіз. Енді ауылдың ортасында сахнамыз бар. Жергілікті билік өкілдерінің айтуынша, бұл жер болашақта тағы да көркейе түседі. Сахнаның төңірегіне орындықтар қойылып, субұрқақтар орнатылады. Мұндай бастаманы ұйымдастырып, осындай орынды дайындап, халыққа пайдалануға беріп жатқандарға алғыс айтамыз, – дейді Болашақ өрт сөндіру пойызында еңбек ететін ауылдың қоғамдық қауымдастық төрағасы Ерболат Бытықов.  

Болашақта республика күні кең көлемде аталып өтті. Жаңа сахнада өнерпаз қыз-жігіттер күшімен концерттік бағдарлама қойылып, ән шырқалып, күй шалқыды. Ақжаулықты аналар шашуын шашып, ақсақалдар батасын беріп, ауыл сахнасын мерекелік думанға бөледі.