Таразда теміржол күзетшілері 472 түп ағаш отырғызды

«Қазақстан темір жолы» ҰК» АҚ бастап, барлық өңірде жалғасқан «Таза Қазақстан» жалпыұлттық жоба шеңберіндегі тал отырғызу ауқымды экологиялық акциясына «Әскерилендірілген темір жол күзеті» ЖШС Тараз филиалының қызметкерлері де өз үлестерін қосуда.

Филиал қызметкерлері бір кісідей жұмылып, сенбілікке шығып, Тараз қаласындағы «Барысхан» тұрғын үй алабындағы жол бойына 472 түп тал отырғызды.  

– «Қазақстан темір жолы» ҰК» АҚ-ның бастамасына үн қосу үшін экоакцияға аппараттың барлық қызметкерлері, Тараз станциясындағы әскери күзетшілер түгел қатысты. Осы арқылы олар ұжымның ішкі бірлігін, экологиялық құндылықтарға деген жоғары бағасын көрсетті. Тал егу үшін шаһардың шеткері аумағын арнайы таңдадық. Күні ертең жасыл желек жайқалып өсіп, саялы ағашқа айналғанда жас ұрпақ бұл – жалпы теміржолшылардың әскерилендірілген темір жол күзетінің тартуы екенін біліп жүрсін деп ойладық.  

Жалпы біз филиал мекемесінің аумағында көктем-күз айларында жаппай тазалық жұмыстарын жүргізіп тұрамыз. Ғимарат айналасына көпжылдық тал-дарақтар отырғыздық. Күздік, жаздық гүл егіп, оны күтіп-баптау жұмысы жолға қойылған, – дейді  «Әскерилендірілген темір жол күзеті» ЖШС Тараз филиалының директоры Еркін Мүсілімов.