Байланыстың сенімді кепілі

Шалқар белгі беру және байланыс дистанциясы өндіріске заманауи технологияларды батыл  енгізіп, темір жолдағы қауіпсіздік пен сенімді байланыс деңгейі жылдан жылға артып келеді.

Темір жол бойындағы қауіпсіздік пен үздіксіз байланыс – теміржолшылардың ең басты міндеттерінің бірі. Осы бағытта «ҚТЖ» ҰК» АҚ – «Ақтөбе магистральдық желі бөлімшесі» филиалының Шалқар белгі беру және байланыс дистанциясы жүйелі әрі нәтижелі жұмыстар атқарып келеді.  375 адам еңбек ететін ұжым белгі беру және байланыс шаруашылығының негізгі желілік өндірістік жұмысын атқарып, пойыздардың қауіпсіз әрі үздіксіз қозғалысын қамтамасыз етумен қатар, теміржол көлігінің ақпараттық-есептеу қызметтері мен телекоммуникациялық құралдарға деген қажеттілігін тиянақтап отыр.

Дистанция бастығы Нұрболат Төпештің айтуынша, 2025 жылдың он айында мұнда бірқатар маңызды жұмыстар атқарылған. Биыл мысалы дистанция қызметкерлерінің қүшімен Қауылжыр, Ұлпан және Шоқысу станцияларында СОБ жүйесінің 36 дана станциялық аккумуляторлары жаңартылған.  

– Биыл дистанцияда Бершүгір мен Тоғыз станцияларында АСТ/2.130 типті стационарлық антенналар орнатылды. Сонымен қатар байланыс магистральдық кабелі бойынша 181 дана қорғасын муфталар полиэтиленді муфталармен ауыстырылды. Ауыз толтырып айтатын жасалған жұмыс жетерлік. Шалқар – Тассай учаскесінде «ТЕТРА» стандарты бойынша радиобайланыс аппаратурасының 24 аккумулятор жиынтығы жаңартылды. Сол учаскеде оперативтік-технологиялық байланыс (МХ-1000) аппаратурасына 124 аккумулятор жиынтығы ауыстырылды. Бұл жұмыс сапасын жақсарта түсетіні сөзсіз.

Қауылжыр – Қайыр және Шалқар – Үшқұрай аралығындағы СОБ және байланыс құрылғылары сапа эталонына сәйкестендірілді. Бұл дегеніміз – белгі беру, орталықтандыру және блокировка жүйелері мен байланыс құрылғылары белгіленген техникалық стандарттар мен сапа талаптарына сәйкестендірілді деген сөз. Яғни пойыз қозғалысының қауіпсіздігі мен үздіксіздігін қамтамасыз ету үшін қолданылатын бұл құрылғылар қайта тексеріліп, қажетті жағдайда жаңартылып, заманауи талаптарға сай келетін деңгейге келтірілді, – дейді дистанция бастығы.

Сонымен қатар қызметкерлердің жұмыс жасауына ыңғай жасау және әлеуметтік жағдайын жақсарту мақсатында Шалқар станциясындағы байланысшылар үйі мен ОКИП ғимаратына ағымдағы жөндеу жұмыстары жүргізілген. Алабас және Қырғыз станцияларында қуаты 8 кВт болатын екі дизель-генератор агрегаты орнатылып, іске қосылған. Жем станциясындағы төрт ғимаратта газдандыру жұмыстары аяқталуға жақын. Қазіргі уақытта Шалқар – Бейнеу учаскесінде жүк тасымалының артуына байланысты автоблокировка жүйесін жаңғырту жұмыстары басталыпты. Міне, осындай нәтижелі де сапалы жұмыстары үшін Шалқар сигнализация және байланыс дистанциясы «Үздік белгі беру және байланыс дистанциясы» атағын иеленіп, ауыспалы ту алды.  

– Президент жариялаған «Жұмысшы мамандықтар жылы» аясында біздің бірқатар теміржолшылар да марапатталып, олардың кәсіби шеберлігі мен адал қызметі жоғары бағаланды. Бұл – қарапайым жұмысшыларға деген құрметтің белгісі, – дейді дистанция басшысы.