Өткелдерді жаңарту жалғасуда
Маңғыстау облысы бойынша меншікті тілші
Маңғыстау магистральдық желі бөлімшесіне қарасты Маңғыстау жол дистанциясы аумағында орналасқан теміржол өткелдерінде жөндеу жұмыстары жалғасуда. Жыл басынан бері бірнеше жердегі өткелде жол төсемі ауыстырылды.
Жұмыс қазан-қараша айларында жандана түсіп, үш өткел жөндеуден өткен. Дистанцияда өткелдер жағдайына жауапты мамандардың бірі, жетекші жол инженері Мұхтар Кульчанбаевтың айтуынша, бұл жұмыстар Маңғыстау – Өзен учаскесіне қарасты бекеттер аралығындағы 13, 179,73 шақырымдардағы теміржол өткелдеріне қатысты. «Р» бекеті – Боржақты станциясы аралығында 13-шақырымдағы өткелдің жарамсыз төсемдері алынып, жаңасы салынған. Жетібай – Өзен станциялары аралығындағы 179-шақырымдағы теміржол өткеліне жанасатын жол толықтай жаңартылған. Аталған жұмыстар жергілікті әкімдікпен бірлесе атқарылып, жаңадан асфальт төселген. Қарақия – Жаңаөзен станциялары аралығындағы 73-шақырымның өткелінде де осындай жұмыстар атқарылған. Өткелдегі ескірген төсем темірбетонмен ауыстырылған.
– Жыл басынан бері Тамақ бекеті мен Маңғыстау станциясы аралығында 399-шақырым, №16 – Тамақ бекеттері аралығында 388-шақырым, №15-16 бекеттері арасында 377-шақырым, Шетпе станциясы мен №14 бекет арасындағы 314-шақырымдағы өткелдерде әртүрлі жөндеу жұмыстары жасалды. Әр өткелде қажеттілігіне қарай ескі материалдар жаңасына ауыстырылып, тиісті жұмыстар атқарылды. Жөндеу барысында қозғалысты көп тоқтатып қоймау үшін керекті шаралар алынды.
Мәселен, Өзендегі өткелді жөндеу кезінде жұмыс көлеміне қарай жол қозғалысы бір тәулікке дейін шектелсе, 13-шақырымдағы өткелде қозғалыс тоқтаған жоқ. Жолдың бір жағын жауып қойып жұмыс жүргізіп жатсақ, екінші жағын ашық қалдырып, автокөліктердің жүруіне мүмкіндік болды. Екінші тараптағы жөндеу барысында да солай болды, қозғалысты шектеген жоқпыз.
Айта кететін жайт, бұл өткелдер автокөлік қозғалысы көп жолдарда орналасқан. Жақында осы және басқа да қозғалысы көп өткелдерде Маңғыстау, Мұнайлы, Қарақия аудандары және Жаңаөзен қаласындағы желілік полиция өкілдерімен бірлесе жол-көлік оқиғаларының алдын алу үшін профилактикалық жұмыстар жүргіздік, – дейді Маңғыстау жол дистанциясының жетекші жол инженері Мұхтар Кульчанбаев.