Үздіктер анықталды

Қызылорда белгі беру және байланыс дистанциясында жыл жұмысын қорытындылаған жиын өтті.

Жыл бойы пойыз қозғалысының қауіпсіздігін қамтамасыз ету жолында аянбай еңбек еткен сала мамандары бүгін өз білімін, білігін, тәжірибесін ортаға салды. Әр бригаданың өз учаскесінде атқарған жөндеу жұмыстары, байланыс және сигнализация құрылғыларына жасалған күнделікті кәсіби күтім деңгейі, ревизорлық тексерулердің қорытындысы, жалпы өндірістік тәртіп пен жауапкершілік, барлығы жан-жақты сарапқа салынды. Осындай қатаң әрі әділ бағалау нәтижесінде жүлделі орындар телімдер арасында тартысты бәсекеде анықталды.  

Нәтижесінде I орын Майлытоғай – 14-разъезд СОБ құрылғыларына қызмет көрсету бригадасына бұйырды. II орынды Бірқазан – Бәйгеқұм телімінің КТСМ бригадасы иеленді. Ал III орынға аға электромеханик Алмасбек Тұрымбетов басқаратын Механизация және автокөлік бригадасы лайық деп танылды.  

Сонымен қатар жиын барысында жеке номинациялар бойынша да нағыз майталмандар анықталды. Сарапшылар еңбектерін ерекше бағалаған радиобайланысшы Есенәлі Мардан, СОБ маманы Бақыт Майгелдиев, байланысшы Ерсұлтан Қыдырбаев, КТСМ маманы Қарасай Әділханұлы, сондай-ақ Жөндеу-технологиялық телімінің маманы Мырзабай Асқаров Жыл үздігі атағын иеленді.  

Жиын соңында мекеме басшысы Әбдірахман Сырғабаев жүлдегерлерді құттықтап, барлық теміржолшыларға алдағы уақытта да биік белестерді бағындырып, қауіпсіздік пен сапа жолындағы еңбектеріне жеміс тіледі. Ал кәсіподақ ұйымының төрайымы Ғалия Қожахметова үздіктерге естелік ретінде бағалы сыйлықтар табыстап, дистанция бастығының арнайы дипломдарын тапсырды.