Сексеуіл локомотив депосы жылды табыспен қорытындылады
Қызылорда облысы бойынша меншікті тілші
Сексеуіл локомотив пайдалану депосында өткен жыл қорытындысына арналған жиын өтті. Теміржол саласының ауыр да жауапты жүгін көтеріп жүрген еңбек адамдарының маңдай тер, табан ақысына алғыс айтылып, құрмет көрсетілді.
Жыл бойғы тынымсыз еңбектің нәтижесі депоның жылды табысты аяқтауына сеп болғаны анық. Сондықтан Жұмысшы мамандықтар жылы аясында өткен жиын теміржолшылар еңбегінің қоғам үшін қаншалықты маңызды екенін тағы бір мәрте айқындады. Депо бастығының орынбасары Еркебұлан Аяғанов темір жолдың тоқтаусыз қозғалысы – осынау еңбек адамдарының арқасы екенін жеткізді.
Басшылықтың шешімімен депоішілік жүргізілген байқау нәтижесі шығарылып, Батырбек Қосбармақов «үздік бригадир», Бекен Демеуов «үздік бөлім басшысы», Асылбек Текебаев «үздік маман», Асылхан Ибрагимов «үздік керуен», Жаңалық Нұрмағанбетов «үздік машинист», Мадияр Өтемісов «үздік машинист көмекшісі», Айдос Ниязбаев «үздік машинист-нұсқаушы», Жасұлан Ұлықпанов «үздік жөндеуші» атанса, «үздік бөлім» номинациясын өндірістік-техникалық бөлім иемденді. Осылайша жыл үздіктері шеруінде депоның озат, кәсіби мамандарына құрмет көрсетіліп, олардың тәжірибелері үлгі етілді.
– Үздіктерге құрмет көрсету – еңбек адамына деген шынайы сыйластықтың көрінісі. Бұл дәстүр бізде жақсы үрдіске айналды. Әрбір үздіктің есімі жеке аталып, құрмет пен қошеметке бөленіп, сый-сияпатқа ие болды, – дейді депо кәсіподағы ұйымының төрағасы Нұрлан Жұмқанов.