Ақтөбеде пойыздар жылдамдығы артты

Ақтөбе магистральдық желі бөлімшесі өткен жылы жол табанын айтарлықтай сауықтырды. Нәтижесінде аймақ жолдарында пойыздар жылдамдығын арттыруға қол жеткізілді.

Соның ішінде тальго вагонды жүрдек жолаушы пойыздары 55,8 шақырымда, жай жолаушылар пойыздары 55,8 шақырымда, контейнер пойыздарда 53,8 шақырымда, жүк пойыздарында 50,3 шақырымда жылдамдықтары артты.  

Әйтсе де, жолға шығып кететін қараусыз малдан төнетін қауіп-қатер азаймай отыр. Биыл бөлімше аумағында теміржолшылар өз күшімен 142 шақырым жол бойына қоршау орнатты. 1610 шақырым бұрын жасалған қоршауға жөндеу жүргізілді. Теміржолшыларды қынжылтатыны, жергілікті тұрғындар тарапынан немесе қараусыз қара малдың қоршауды бүлдіріп кететін оқиғалар да жетеді. 

– Қазір елдің жағдайы жақсарды. Мал ұстайтындар көбейді. Сондықтан әсіресе бақташысыз, қараусыз жүретін мал көп. Бұл темір жолға үлкен мәселе болып тұр. Жолға жақын елдімекендерге, шаруа қожалықтарына барып, түсіндіру жұмыстарын үнемі жүргіземіз. Пойыздың жолдан шығып кету қаупі болатынын, оқыс тежеу, пойыздар кідірісі қандай зиян әкелетінінін, шығын болатынын түсіндіреміз. Бірақ адамдардың немқұрайлығында шек жоқ, елең қылмайтындар көп, – дейді Ақтөбе магистральдық желі бөлімшесі директорының орынбасары Темірғали Куштаев.  

Бүгінде ақтөбелік теміржолшылар барлық күшті жолды қардан тазалап, қозғалыс қауіпсіздігін қамтамасыз етуге жұмсауда. Бөлімше қарамағында 56 арнайы қар тазалау техникасы бар. Әр техникаға нақты міндет жүктеліп, жұмыс істейтін аумағы бекітілген.