Ақтөбелік теміржолшылар жылды табысты бастады

«ҚТЖ-Жүк тасымалы» ЖШС «Ақтөбе» филиалы 2026 жылды негізгі пайдалану көрсеткіштері бойынша жақсы нәтижемен бастады. Қаңтар қорытындысы бойынша вагон мен локомотив өнімділігі жүз пайыздан асыра орындалды.

Филиалдың техникалық бөлім бастығының орынбасары Әлия Абдуллинаның хабарлауынша, қаңтарда негізгі пайдалану көрсеткіштері жоспардан жоғары деңгейде орындалып, өндірістік үдерістердің тиімділігі артқан.  

– Қаңтар айында жұмыс вагонының айналымы жоспарға шаққанда 106,9%-ды құрап, жергілікті вагон айналымы 104,0% деңгейінде орындалды. Бірінші техникалық станциядағы тұрып қалу көрсеткіші 118%-ға жетіп, жоспардан айтарлықтай жоғары болды. Бос вагондардың жүк тиелген вагондарға қатынасы 103,7% деңгейінде қалыптасты. Вагонның орташа тәуліктік өнімділігі 110,3%, ал оның тәуліктік жүрісі 111,3% орындалды, – деді Ә. Абдуллина.  

Сонымен қатар локомотивтің орташа тәуліктік жүрісі, учаскелік жылдамдық, техникалық жылдамдық және локомотив өнімділігі жоғары деңгейде қамтамасыз етілген. Жүктің орташа тәуліктік тиеу көрсеткіші де жоспардан асып, өткен жылмен салыстырғанда едәуір артқан. Ал Орал өңірінде бұл көрсеткіш әлдеқайда жоғары болып, жоспардан айтарлықтай өскені байқалады.  

Филиал өткен жылда да барлық көрсеткіштер бойынша өсімге қол жеткізді. Жүк айналымы 4,4%-ға артты. Жоспарланған 27 352 млн ткм орнына нақты 28 552,1 млн ткм орындалды. Бұл негізгі қор қалыптастыратын табысты көрсеткіштердің өсуін қамтамасыз етті.  

Қазір өңірде Қандыағаш – Никельтау – Әйтеке би учаскесінде автоблокировка жүйесі мен жеті жаңа разъездің құрылысы басталды. Бұл учаскенің өткізу қабілетін екі есеге жуық арттырады. Сондай-ақ Никельтау станциясында айналма жол салу жоспарланып, пойыз қозғалысы жылдамдап, вагондардың тұрып қалуы азаяды. Жобаны биылғы жылы аяқтау көзделген.