Маңғыстау локомотив депосы жаңа тепловоздармен толықты
Маңғыстау облысы бойынша меншікті тілші
Алдағы уақытта Маңғыстау локомотив депосы паркіндегі тепловоздардың жартысынан астамы жаңарады. Қытаймен келісімшарт негізінде депоға отыз шақты локомотив сатып алу жоспарланған. Бүгінге дейін оның он жетісі жеткізіліп, пайдалануға берілді.
Өткен жылғы желтоқсанға дейін жетеуі жеткізілген болса, биыл тағы он данасы алынды. Алғашқы ТЭ36А сериялы қос тепловоз түбекке қазан айында жетіп, екі айлық сынақ мерзімі тағайындалған болатын. Қазір депо шаруашылығында қолданыстағы бұл қытайлық локомотивтер техникалық сипаттамасы бойынша жоғары бағалануда. Сынақтан сүрінбей өткен тепловоздардың екінші легі өткен айда келді. Екі ел арасындағы кедендік бақылаулардан созылуына және жаңа локомотивтердің алдымен Балқаш депосында аялдауына байланысты түбекке келу уақыты біршама кешеуілдеген.
– Қазір депода ТЭ36А серия- лы жаңа 17 локомотив бар. Бұл сериялы тепловоздар жүк тасымалдауға арналған. Бүгінде он машина қолданыста болса, жетеуі депода, оларды эксплуатацияға дайындау жұмыстары жүргізілуде. Жолға шығуға әзірлеу үшін біраз тиісті бақылаудан өткізіп, суын, майын құю дегендей жұмыстары жасалады. Осы процестерді атқаруға қытайлық тепловоз өндіруші зауыттан сегіз маман келген. Барлық процедурасы біткеннен кейін толық дайындығы беріліп, локомотивтер жолға шығатын болады.
Алғашқы келген екі тепловозды сынақ мерзімінен өткізіп, біздің жолдарда жүруге мүмкіндігін тексеріп көрдік. Бәрі сәтті өткендіктен бұл жолы сынақ мерзімі тағайындалмайды. Жаңа келген локомотивтің барлығын Маңғыстау депосында пайдаланудамыз. Болашақта бәрі ойдағыдай болып жатса, айналым деполарының бәріне қажетіне қарай бөлеміз, – дейді Маңғыстау локомотив пайдалану депосының жөндеуді бақылау бөлімінің бастығы Сәбит Зияев.
Жалпы бүгінде депо паркінде 52 тепловоз бар. Оның 17-сі осы аталған қытай өндірісінен шыққан тепловоздар болса, 19-ы МК, 11-і ТЭМ2, қалған бесеуі – ТЭМ11А, ТЭ33А сериялы локомотивтер. Ескі тепловоздар қолданыстан шығарылып, орны су жаңа тепловоздармен толығуда.
Сәбит Зияевтің айтуынша, жаңа үлгідегі тепловоздарды жүргізуге өткен жылы деподан төрт машинист оқып келген. Қазір олар осы тұрғыда өзге әріптестерін үйретуде. Тепловоз өндіру зауытымен «ҚТЖ» арасындағы келісімшарт бойынша алдағы уақытта 25 адамды осы тепловоздарды жөндеу мен пайдалануға Қытайда оқыту күтілуде.