Технологиялық жаңғыру: Қазалы дистанциясының жетістіктері

Қызылорда өңірінің солтүстігіндегі тораптық бекетте орналасқан Қазалы белгі беру  және байланыс дистанциясы пойыздар қозғалысының қауіпсіздігін қамтамасыз етуде маңызды орын алады. Бүгінде мекеме Сексеуіл – Жосалы станциялары арасындағы 358 км  мен жаңа телім, Сексеуіл – 10 бекет разъезі аралығындағы 276 км аумақтағы СОБ, байланыс, радиобайланыс және КТСМ-02 құрылғыларына техникалық қызмет көрсетіп отыр.  

Өткен жыл дистанция үшін нәтижелі болды. Жыл бойы СОБ, байланыс және радиобайланыс құрылғыларының жұмысында ақаулар тіркелмей, техникалық күтім жоспары «өте жақсы» деңгейінде орындалды. Сонымен қатар еңбек тәртібін бұзу немесе өндірістік жарақат алу жағдайлары орын алған жоқ. Бұл – ең алдымен ұжымның кәсіби деңгейі мен жауапкершілігінің айқын көрінісі деп бағалаған дистанцияның бас инженері Жанболат Досжанов, әріптестерімен бірге атқарған жұмыстардың біршамасын саралап, жасалатын жоспарлы жұмыстарға шолу жасады.

Дистанция бойынша былтыр бірқатар жаңғырту және жөндеу жұмыстары жүзеге асырылыпты. Мәселен, Арал теңізі және Қазалы станцияларында ескі үлгідегі дизель-генераторлар заманауи құрылғыларға ауыстырылған. Өндіріске жаңа үлгідегі РЛСМ-10-48 радиостанциялары енгізіліп, қуат көздері жаңартылған. Сексеуіл, Сапақ, Аралқұм, Шөміш станцияларындағы Пост ЭЦ ғимараттарына жөндеу жүргізілген. Сондай-ақ релелік бөлмелерге кондиционерлер орнатылып, бірқатар бекеттердегі ғимараттар мекеме қызметкерлерінің күшімен жаңартылған. Аралқұм – Шөміш станциялары аралығындағы құрылғылардың сапасын стандартқа сәйкестендіру жұмыстары жүргізілген.

– Бөлімше басшылығының қолдауымен, дистанция бастығы Арнұр Дінахметовтың ұйымдастыруымен өткен жылы атқарылған жұмыстардың нәтижесінде құрылғылардың сенімділігі едәуір артты. Жаңартылған дизель-генераторлар мен жаңа радиостанциялар пойыздардың қозғалыс қауіпсіздігін қамтамасыз етуде маңызды рөл атқарып отыр. Ұжымның бірлескен еңбегінің арқасында ақаусыз жұмыс көрсеткішіне қол жеткіздік, биыл да қауіпсіздік шараларын арттыруға басымдық беріп жұмыс жүргізудеміз, – дейді бас инженер Жанболат Досжанов.

Қозғалыс мәдениетінің жаңа стандарты жобасы аясында дистанцияның Сексеуіл-Қоскөл жаңа телімінде ЦАБ-АЛСО-QRA заманауи жаңа құрылғысы жылдың алғашқы айларында қолданысқа енгізілуі аймақтағы пойыздар қозғалыс қауіпсіздігін арттыру сапасына жаңа серпіліс берген жаңалық болды.

Дистанция бойынша ағымдағы жылда да бірқатар жұмыс атқаралады деп жоспарланып, ауқымды шаралар белгіленіп қолға алынып жатыр. Атап айтқанда, Сексеуіл – 10-шы бекеті аралығында автоблоктау жүйесін енгізу және станцияларды микропроцессорлық жүйеге көшіру көзделуде. Қазалы станциясындағы байланыс үйіне жөндеу жүргізіліп, Қазалы-Бекбауыл станциялары аралығындағы құрылғылар сапасы стандартқа сәйкестендірілмекші. Ордазы бекетінде жаңа модульді ЭЦ постының ғимараты пайдалануға берілмек. Сонымен қатар Төретам станциясында ZH4100D дизель-генераторымен жаңартылған, бірнеше станциядағы ғимараттарға жөндеу жұмыстары жүргізіледі деп күтілуде.

Дистанция ұжымы алдағы уақытта да теміржол қауіпсіздігін қамтамасыз ету, техникалық базаны жаңғырту және еңбек сапасын арттыру бағытындағы жұмыстарды жүйелі түрде жалғастырып басты нысананы қауіпсіздікке бағыттап жаңғырту жұмыстарын жалғастыра бермек.