Маңғыстаулық теміржолшылар техникалық базаны нығайтуда

Қатал қысты артқа тастаған Маңғыстау вагон пайдалану депосы көктемгі байқауды өткізіп, жаз мезгіліне дайындалуда. Былтырғы бірінші қазаннан жергілікті жүк тасымалы бөлімшесінен бөлініп шығып, тікелей жүк тасымалы дирекциясының құрамына өткен Маңғыстау вагон депосында өзгерістер аз емес.

Былтыр депо директоры Майлыбай Камалов зейнетке кетіп, орнына бас инженер Ерболат Сәулебав тағайындалды. Түбек теміржолында қарапайым жұмысшыдан бастап, депоға қарасты бірнеше ТҚКП-де еңбек етіп, бас инженер болғанға дейін түрлі қызмет сатысынан өткен білікті маман. Сол секілді директордың орынбасары, бас инженері де жергілікті теміржолда шыңдалған жастар. Демек, бүгінде депо басшылығы жастардың қолында. Депода өткен жылы жылу жолдары жаңартылып, кейбір ғимараттарда жөндеу жұмыстары жүргізілген. Соның есебінен еңбек жағдайы жақсарып, қыс бойы жұмысшылар жылы орында жайлы жұмыс істеді.  

Депо басшылығының мәліметіне сүйенсек, былтыр 450 метрдей жылу трассасы жаңартылған. Техникалық қызмет көрсету пункттерінде, жұмысшылардың жуынатын орындарында жылу батареялары жаңартылған. Сондықтан жұмысшылар қыс бойы бұрынғыдай есік-терезені қымтамай, бөлмені желдетіп, жайлы орында отырып жұмысын жалғастырған.  

Сонымен қатар өткен жылы вагон қараушылар мен операторлардың құрамы толыққан. Бейнеу станциясында жолаушылар және жүк тасымалының артуына байланысты станцияға қосымша «Б» паркі ашылғандықтан вагондарға қызмет көрсету саласын да соған сай ыңғайланып қайта құрылған. Жаңадан вагон қараушылар мен оператор, шеберлер жұмысқа алынған. Яғни, былтырдан бері Бейнеу ТҚКП төрт оператор мен сегіз вагон қараушы және бір шебермен толыққан.

 – Қазір көктемгі комиссиялық байқау жүріп жатыр. Бізде ол алтыншы сәуірден басталды. Тексерістерге шыққанда нысандарымыз бен техникалық құралдарымыздың кем-кетігін түгендеп, жазға дайындықпен қатар, келесі қысқа қажеттіліктер бойынша жоғары басшылыққа тиісті хабарлама жібереміз. Осы қыста техникалық құрал-жабдықтарымыздың бәрі штатты режимде жұмыс істеді. Енді бізге домкраттарды, Бейнеудегі Узотты жаңарту қажет. Крандарымыз жаңа, – деген Маңғыстау вагон пайдалану депосының директоры Ерболат Сәулебаев былтыр депоның Шетпедегі ғимараты толықтай ағымдық жөндеуден өткенін, мұндай жұмыс биыл тағы бірнеше нысанға жоспарланып отырғанын жеткізді.