Ақтөбе станциясында аса қауіпті инфекцияға қарсы оқу-жаттығу өтті
Ақтөбе облысы бойынша меншікті тілші
Ақтөбе станциясында аса қауіпті инфекцияға күдікті бойынша арнайы оқу-жаттығу өтті. Төтенше жағдай туындаған жағдайда тиісті қызметтердің дайындығы тексерілді.
Жаттығу №33 «Алматы-Ақтөбе» жолаушылар пойызының 40 жастағы жолаушысынан қауіпті инфекция белгілері анықталумен басталды. Алдын ала мәлімет бойынша, ол мал союға қатысып, жарақат алғаннан кейін денсаулығы нашарлаған.
Оқиға орнына жедел жеткен мамандар вагонды санитарлық-карантиндік тұйыққа оқшаулап, айналасына қоршау қойды. Арнайы құрылған консультативтік, эвакуациялық, эпидемиологиялық және дезинфекциялық төрт топ бірлесе үйлесімді жұмыс жүргізді. Күдікті науқас оқшауланып, облыстық инфекциялық аурулар ауруханасына жеткізілді. Вагондағы байланыста болған жолаушылар медициналық бақылауға алынып, толық дезинфекция жұмыстары жүргізілді.
Ақтөбе бөлімшелік көліктегі санитарлық-эпидемиологиялық бақылау басқармасы санитарлық-карантиндік оқу-жаттығуды ойдағыдай өткізді.
«Іс-шара өңірде инфекциялық аурулардың алдын алуға бағытталған. Аса қауіпті әрі карантиндік инфекцияға күдікті жағдай анықталған кезде санитарлық-эпидемияға қарсы қызметтердің әрекет ету дайындығы пысықталды. Оқу-жаттығу қорытындысында бақылаушы органдар барлық қызметтердің іс-қимылына жоғары баға берді», – деді санитарлық-эпидемиологиялық бақылау және қадағалау бөлімінің бас маманы Сандуғаш Танатар.
Шараға облыстық клиникалық инфекциялық аурулар ауруханасы, жедел медициналық көмек қызметі, обаға қарсы күрес станциясы, ұлттық сараптама орталығы, желілік полиция бөлімі, әскерилендірілген теміржол күзеті және жолаушылар тасымалы саласының өкілдері қатысты.