Қызылордада даңқты теміржолшы Үдербай Баймаханов атындағы көше ашылды
Қызылорда облысы бойынша меншікті тілші
Қызылорда қаласында теміржолшы атымен аталатын тағы бір көше бар. Отан қорғаушылар мен Жеңіс күні қарсаңында соғыс және еңбек ардагері, даңқты теміржолшы Үдербай Баймаханов атындағы көшенің ашылу салтанатына облыстық, қалалық және салалық, аймақтық теміржолшы ардагерлер кеңесі мен жергілікті атқарушы билік өкілдері қатысты.
Облыстың Сырдария ауданында дүниеге келген Үдербай ақсақал Қызыл-Егінші колхозында еңбек етіп жүрген жерінен 1942 жылы соғысқа алынғанда 23 жастағы жігіт екен. Бірнеше ай дайындықтан өткен соң Украина майданына түсіп, атты әскер полкінде жорығын бастайды. Қанды қасап соғыстың ең қиын кезі 42-43 жылдарды артқа тастап, зеңбірек полкіне ауысып, командир болады. Әскери шені – кіші сержант.
1944 жылы кеңес әскері алға жылжи бастайды. Украина мен Белоруссиядан кейін Румынияның Будапешт, Югославияның Белград қалаларын азат еткен қызыл армия қатарында Үдербай Баймаханов соғысты Австрияның Вена қаласында аяқтайды. Майдандағы ерлігі үшін «Ұлы Отан соғысы» орденімен, екі рет «Ерлігі үшін» медалімен марапатталған. Сонымен қатар «Германияны жеңгені үшін», «Будапешті азат еткені үшін», «Белградты азат еткені үшін», «КО маршалы Г.К.Жуков» және басқа да марапаттар иеленген.
Соғыстан аман оралған Үдербай ақсақал 1946 жылы бейбіт еңбекке араласады. Алдымен фабрикада, кейін тұтынушылар бірлестігінде еңбек етіп, 1961 жылдан бастап Қызылорда теміржол станциясының әскери күзетінде атқыш болып он шақты жыл тер төгіп, 1970 жылдан 1985 жылға дейін Қызылорда станциясында жүк қабылдаушы-өлшеуші болып еңбек етіп, зейнетке шыққан.
Үдербай Баймахановтың атындағы көшенің ашылуы салтанатында сөз алғандар сол дәуірдегі теміржол жұмысының қиындықтарын сөз етті, барлығы қолмен атқарылғанын, жалпы соғыстан кейін ондаған жылдар бойы елдегі ауыр жағдай сақталғанын сөз еткен ардагерлер соғыс және еңбек ардагерлеріне құрмет пен тағзым лайықты деп бағалайтындарын білдірді.
– Теміржол саласында ширек ғасыр ерен еңбектің үлгісін көрсеткен Үдербай ақсақал бірнеше рет теміржол саласы басшылығы тарапынан Құрмет грамотасымен марапатталып, «Социалистік жарыстың жеңімпазы» атаныпты. «Коммунистік еңбек озаты» белгісін екі-үш мәрте иеленіп, қосымша бағалы сыйлықтармен марапатталған теміржолшының есімі Қызылорда қаласындағы көшелердің біріне берілуі – теміржолшылар үшін мәртебе мен мақтаныш. Көшенің ашылуына облыстық, қалалық ардагерлер кеңесі тарапынан үлкен көмек көрсетіліп, ауқымды жұмыс жасалды, қолдау білдірген органдарға алғыс айтамыз, – деді аймақтық теміржолшы ардагерлер кеңесінің төрағасы Марат Шайжан.
Жұбайы Күләш Бейсенқызы екеуі 7 ұл-қыз тәрбиелеп өсірген Үдербай ақсақалдың ұрпақтары көпшілікке алғыстарын білдіріп, әке рухына бағыштап дастархан жайды.