Ардагерден бата алды

Маңғыстау локомотив депосының басшылығы және кәсіподақ ұйымы депода еңбек еткен ҰОС тыл ардагері Жұма Сүйіндіковті Жеңістің 81 жылдығымен құттықтап барып, хал-жағдайымен танысып қайтты.  

Бүгінде Жаңаөзен қаласының Теңге ауылында тұратын қария биыл 96 жасқа қарады. Әріптестері келді дегенде ардагер жатқан орнынан бас көтеріп, келгендермен қуана амандық-саулық сұрасты. Қонақтар құрметіне қатарда отырып, батасын беріп, ризашылығын білдірді. Қарттық қысқан жүзіне қуаныш үйіріліп, өткен кеткенді сұрап, мәз-мейрам болды. Еңбектегі жылдарын еске алды. Депо басшылығы мен кәсіподақ төрағасы ақсақалға ақжарма тілегін арнап, ол кісінің ел үшін де, депо шаруашылығында да еңбегі орасан екенін тілге тиек етті.  

Жұма Сүйіндіков түбектің локомотив шаруашылығында көп жыл қызмет еткен. Зейнетке шықса да жұмысын жалғастырып, артында талай шәкіртті тәрбиелеп шығарған мәртебелі машинистерден.  

1930 жылы туған ол ҰОС басталғанда Түркіменстанның Молотов колхозында қойшы көмекшісі, егінші болып тылды бекемдеу жұмысына араласқан. Соғыс аяқталғасын 1946 жылы Краснаводск қаласындағы ФЗО-да жарты жыл тепловоз машинисінің көмекшісі кәсібіне оқып, құжатын алып Уфра қаласына аттанады. Уфрада сол мамандық бойынша жұмыс істеп, соғыстан кейінгі жылдардағы қалпына келтіру жұмысына атсалысады. 1950 жылы әскер қатарына алынып, төрт жылдан соң ауылына оралғасын машинист курсын оқиды. Маңғыстауға 1966 жылы алғашқы теміржолшылардың бірі болып келіп, зейнеткерлік жасына жеткенге дейін депода еңбек етеді.