Әмбебап маман
Ақтөбе облысы бойынша меншікті тілші
Қандыағаш вокзалында кілең қыз-келіншектің арасында жұмыс істейтін Төремұрат Түнғатаровтың 30 жылдық тәжірибесі бар. Вокзалдағы су, жарық және басқа да ұсақ-түйек жөндеу жұмыстарының барлығы соның мойнында.
Оның жұмысы таңғы сағат 8:00-де басталады. Алдымен толық тексеріс жүргізіп, вокзалдың ішкі-сыртқы жағдайын қарап шығады. Одан кейін жоспарлы жұмыстарға кіріседі. Әріптестері оның «жоқ» немесе «болмайды» дегенін естімеген. Керісінше барлық мәселенің шешімін табуға тырысады. Жұмысын тиянақты атқарады, оның қолына түскен кез келген жұмысқа жан біткендей болады.
Кейіпкеріміз өз ісінің нағыз шебері. Қандыағаш вокзалының бүкіл қара жұмысын жалғыз атқарып отыр деуге болады. Қай жерде ақау болса, сол жерден табылады. Құбырдың дыбысын тыңдап-ақ мәселені анықтайтын тәжірибелі маман күрделі жағдайларды да опоңай еңсереді, сантехник, плотник, электрик – 3-4 мамандықты қатар атқара береді, бір сөзбен айтқанда әмбебап маман. «Біздің универсал маман» деп әріптестері мақтан тұтып, қадірін біледі.
– Қолымнан келетін жұмыстан аянып қалмаймын, бір-бірімізге көмектесіп жүргенге не жетсін. Демалыс күндері де қажет болса, шақырса, бара беремін, маған қажет кезде вокзал басшылары да аянып қалған емес, сонша жылдан бері бір отбасыдай болып кеткенбіз, – дейді ол.