Қозғалыс қауіпсіздігін күзеткен теміржолшылардың аналарына құрмет көрсетілді
Маңғыстау облысы бойынша меншікті тілші
Халықаралық аналар күніне орай «ҚТЖ-Жүк тасымалы» ЖШС бас директоры Асан Үмбетов қозғалыс қауіпсіздігін сақтауға ерекше үлес қосып жүрген теміржолшылардың аналарына «Линк» бағдарламасы арқылы шығып, өз кәсібіне адал перзенттерді тәрбиелеген жандарға алғысын айтты.
Соның бірі Маңғыстау локомотив пайдалану депосының тепловоз машинисі «Құрметті теміржолшы» Берік Құлбарақовтың анасы – Жаңыл апа. Кездесуге сондай-ақ Маңғыстау жүк тасымалы филиалы директоры Қарақат Жақанов пен оның орынбасары, бөлім басшылары және Маңғыстау локомотив пайдалану депосының бастығы, кәсіподақ комитетінің төрағалары қатысты. Олар да өз кезегінде сөз алып, аналар күнімен құттықтады.
Жанкешті еңбегімен теміржолдағы бүкіл бір апаттың алдын алып қалған машинистің анасына ұлттық нақыштағы камзол кигізіп, орамал жапты.
Берік Құлбарақов осыдан бірнеше жыл бұрын теміржол өткелінде жүк пойызының алдынан жүк көлігі шығып соқтығысқанда тепловозды басқарып келе жатқан болатын. Оқиға болған сәтте пайда болған өрттен денесінің көп бөлігін өрт шалып, жағдайының қиындығына қарамастан дер кезінде шұғыл әрекет етіп, оқыс жағдайдан шыға білген теміржолшы. Сол оқиғадан кейін қанша уақыт төсекке таңылып жатса да ерік-жігері мықтылығының нәтижесінде аяққа қайта тұрып, жұмысына оралған.