Қауіпсіздік пен сапаның жаңа стандарты

Қызылорда белгі беру және байланыс дистанциясы қызметкерлерінің тынымсыз еңбегі болат жолда қауіпсіздік пен сапаның жаңа стандартын қалыптастыруда. Мұны дистанция ұжымының 2026 жылдың алғашқы төрт айында қол жеткізген жоғары өндірістік көрсеткіштерінен байқауға болады.

Дистанция бастығы Әбдірахман Сырғабаевтың сауатты басқаруы және қызметкерлердің кәсіптеріне деген адалдығының арқасында ағымдағы жылдың төрт айында пойыз және маневрлік жұмыстар барысында бірде-бір апатты оқиғаға немесе инцидентке жол берілмеген. Техникалық құрылғыларды күтіп ұстау және оларға дер кезінде жоғары деңгейде сервистік қызмет көрсету өз жемісін беріп, өткен жылдың сәйкес кезеңіндегі 11 ақау биыл 6 бірлікке дейін азайған. Тілсіз техниканың осындай қатесіз жұмыс істеуінің артында құрылғыны баптап, үнемі бақылауда ұстайтын СОБ мамандарының еңбегі тұр. Мәселен, есепті кезеңде пойыз құрамының қоршау шегінен шығып кетуін бақылайтын УКСПС және жүктің габаритсіздігін анықтайтын КГУ құрылғылары бойынша 1 іске қосылу жағдайының тіркелуі жүйенің дер кезінде ықтимал қауіптің бетін қайтарып, үлкен апаттың алдын алғанын көрсетеді. Заман талабына сай болат жолдың бойындағы қауіпсіздікті арттыру мақсатында негізгі құралдарды есептен шығару бойынша 4 жағдайдың тіркелуі де дистанцияның ескірген құрылғылардан арылып, орнына сенімділігі жоғары, жаңа үлгідегі заманауи автоматтандырылған жүйелерді енгізуге бет бұрғанын, яғни даму мен жаңарудың айқын белгісін көрсетеді.  

Әсіресе сәуір айы дистанция үшін нағыз еңбек майданына айналды. Мұнда 2025 жылғы 4 ақаудан биылғы сәуірде мүлдем «нөлдік» көрсеткішке қол жеткізу оңай жұмыс емес еді. Дистанцияда 30-40 жылдан асқан ескі үлгідегі ЭЦ құрылғылары, бағыттамалық бұрма мен жүздеген шақырымға созылған кабель желілері болса да, теміржолшылардың рухы мен кәсібилігі тозған жоқ. Осы айда техникалық қызмет көрсетудің жоғары мәдениетін таныта отырып, Шиелі мен Белкөл станцияларында маневрлік және кіріс бағдаршамдарының монтажы мен батарея шкафтары толық жаңартылды. Бақтысай, Төретам, Қызылтам бекеттерінде трансформатор жәшіктері мен жол қораптары ауыстырылып, қауіпсіздік қалқаны күшейтілсе, Қызылорда мен Жайылма станциясында бағыттамалы бұрмалардың электржетектері мен монтаждары ең озық технологияларды қолдану арқылы қайта жасақталды.  

Дистанция бастығы Әбдірахман Сырғабаев әрбір есепті кезеңнің қорытындысына тек құрғақ сандар тұрғысынан емес, адамның кәсібилігі тұрғысынан қарайды. Ол теміржолшылардың еңбегіне ризашылық айтып, ұжымға алғысын білдірді.  

Шынында да, дистанция қызметкерлері үшін әрбір бағыттамалы бұрма, әрбір бағдаршам мен кабель желісі жай ғана темір мен сым емес. СОБ құрылғысының кез келген секундтық іркілісі тек бір станцияның ғана емес, бүкіл Сыр өңірі мен аймақ теміржолшыларының жұмысына нұқсан келтіруі мүмкін. Сондықтан Қызылорда белгі беру және байланыс дистанциясы ұжымының басты қағидаты, мінсіз қызмет көрсету арқылы қозғалыс қауіпсіздігін сақтап, сапалық және сандық көрсеткіштердің үдесінен көріне білу.