Жаңа көшеге майдангер әрі теміржолшы Өтеубай Ордабайұлының есімі берілді

Қызылорда қаласының тұрғындар енді қоныстанып жатқан Қызылжарма тұрғын ауданында бір көше теміржолшы атымен аталатын болды. Ұлы Отан соғысына қатысушы ардагер-теміржолшы Өтеубай Ордабайұлының есімі берілген көшеге жиналған қауым алғашқы тақтаның қағылуына куә болды.

Көпшілік алдында сөз сөйлеген Қызылжарма ауылдық округінің әкімі Шәріп Әбдрахманов ел дамуына елеулі үлес қосқан азаматтардың есімін ұлықтау кейінгі ұрпақ алдындағы парыз екенін атап өтті.  

– Өтеубай Ордабайұлы – ел үшін ерен еңбек етіп, майдан жолынан өтіп, бейбіт өмірде теміржол саласының өркендеуіне зор үлес қосқан алдыңғы буын ағаларымыздың бірі. Сондықтан Қызылорда қалалық әкімдігі мен мәслихатының шешімімен жаңа аудандағы бір көше аты беріліп отыр. Осындай азаматтардың есімі туған жерінде жаңғырып тұруы жас ұрпақтың отансүйгіштік рухын қалыптастырады, – деді ол.  

Теміржолшы ардагерлер кеңесі төрағасының орынбасары Ахмедияр Пірімбетов бұл оқиғаның теміржолшылар қауымы үшін ерекше маңызға ие екенін айтты.  

– Өтеубай Ордабайұлы теміржол саласында абыройлы еңбек етіп, өз ісіне адалдықтың үлгісін көрсеткен азаматтың бірі еді. Ол қарапайым қызметтен бастап жауапты лауазымдарға дейін көтеріліп, аймақ теміржолының дамуына сүбелі үлес қосты. Өзі еңбек еткен осы қалада бір көшенің ардагердің атымен аталуы – бір адамның ғана емес, тұтас теміржолшылар еңбегіне көрсетілген құрмет. Ал жастар үшін кәсіби жауапкершіліктің мәнін түсіндіретін тағылымды қадам деп білеміз, – деді ардагер теміржолшы.  

Шара барысында Қызылорда локомотив пайдалану депосының қызметкері, Өтеубай Ордабайұлының ұрпақтары Серік пен зейнеткер Молдашбек те сөз алып, соғыс және бейбіт өмірде қажырлы еңбек етіп, ел құрметіне бөленген аталарының есімі Сыр өңірінің тарихында қалғанына зор ризашылықтарын білдіріп, тебірене сөйледі.  

– Атамыздың аты өшпей ел жадында сақталып жатқаны – біз үшін үлкен мақтаныш. Отбасымыздың атынан осы бастаманы көтерген жергілікті билік өкілдеріне, теміржол ардагерлеріне, барша теміржолшылар қауымына шынайы алғысымызды білдіреміз. Бұл құрмет бізге үлкен жауапкершілік жүктейді, – деді Өтеубай Ордабайұлының ұрпақтары.