Теміржолға адал перзент өсірген әкеге алғыс
Маңғыстау облысы бойынша меншікті тілші
«ҚТЖ-Жүк тасымалы» ЖШС Бас директоры Асан Үмбетов Маңғыстау локомотив пайдалану депосы тепловоз машинисінің көмекшісі Азамат Тулеповтың әкесін арнайы құттықтады.
2021 жылы машинист Дәулет Толыбаев пен көмекшісі Азамат Тулепов екеуі жолсапарда келе жатып апаттың алдын алған еді. Олар №15 бекет пен №14 бекет аралығындағы 333-шақырымда теміржолды су басып қалғанын алыстан байқап, пойызды жедел тоқтатып үлгерген. Оқиғаны дереу тиісті қызмет орындарына хабарлап, жол қозғалысына төніп тұрған қауіпті дер кезінде ескертеді.
Өзінің қызметік міндетін адал атқарып, пойыздар қозғалысы қауіпсіздігін сақтаудағы қырағылығы үшін «Қозғалыс қауіпсіздігі үшін» төсбелгісімен марапатталған Азаматтың әкесі Қайрат Тулеповты Әкелер күніне орай ұялы телефонмен бейнеқоңырау арқылы құттықтаған Асан Үмбетов теміржолға адал перзент өсіріп тәрибелегені үшін алғыс айтып, сый-сыяпатын жолдады. Бас директордың марапатын Маңғыстау жүк тасымалы бөлімшесінің персоналды басқару бөлімі басшысы Екпін Қожахметов пен депо басшысы және кәсіподақ ұйымының төрағалары жеткізіп, Азаматтың ата-анасын құттықтап, қуаныштарына ортақтасты.
Азамат Қайратұлы Маңғыстау локомотив депосында 2018 жылдан бері тепловоз машинисінің көмекшісі болып еңбек етеді. Жұбайы Айдана екеуі 6 бала тәрбиелеп, еліміздің демографиялық өсіміне де үлес қосып отырған үлгілі отбасы иесі.