Ганюшкинодағы жаңа вокзал қызметкерлерін Атырау телімінің басшылығы құттықтады

Өткен айдың соңында жаңадан салынып, пайдалануға берілген Ганюшкино теміржол вокзалы қала халқы мен Құрманғазы ауданының тұрғындарын қуанышқа бөледі.

Вокзал бүгінде толық көлемде жолаушыларға қызмет көрсетіп, жаңадан ашылған қос кассада билет сатылып жатыр. Соған орай «Жолаушылар тасымалы» АҚ Атырау телімі бастығының міндетін атқарушы Данияр Кутепов пен Атырау вокзалының касса меңгерушісі Ажар Ахметова Ганюшкино вокзал қызметкерлерін жаңа қоныспен арнайы құттықтап келді.  

– Екі елдің шекарасына жақын орналасқан бұл вокзалдың жаңа ғимаратқа ие болуы үлкен қуаныш. Мұнда тек өзіміздің ғана емес, халықаралық бағыттағы пойыздар да аялдап, айына жүздеген жолаушы өтеді. Ал жаңа да жарық вокзалдың және билет кассаларының жолаушыларға лайықты қызмет ететініне сенеміз, – деген Данияр Кутепов вокзал бастығы Елена Алиеваға гүл шоғын сыйлады.  

Айта кетсек, Ганюшкино жаңа вокзалының жалпы көлемі 800 шаршы метр. Оның ішінде 150 орындық күту залы, мүгедек адамдарға арналған бөлек күту залы, медпункт, вокзал кезекшісінің бөлмесі, екі билет кассасы, полиция бөлімшесі, жолаушыларға арналған жүк қоймасы, т.б. бар. Вокзал айналасы абаттандырылып, жас көшеттер отырғызылған. Касса қызметкерлерінің айтуынша, жарты жылда Атырау-Ганюшкино арасына тек бір бағыттың өзіне 2 мыңдай, ал Атырау мен Астараханға 7 мыңдай жолаушы қатынаған.