Қаперде ұстайтын қағида
Ақтөбе облысы бойынша меншікті тілші
«ҚТЖ» ҰК» АҚ «Жол диагностикасы орталығы» филиалының Ақтөбе өңірлік бас ревизоры Еркінбек Елғондының айтуынша, темір жолдағы қайғылы оқиғалардың басым бөлігі қауіпсіздік талаптарын елемеуден болып отыр.
– 2026 жылдың басынан бері Ақтөбеде пойыздың адамды қағуымен байланысты екі оқиға тіркеліп, біреуі адам өлімімен аяқталды. Ал 2025 жылы мұндай үш жағдай болып, бір адам көз жұмған. Сондықтан темір жол қауіпті аймақ екенін әрдайым ескеруіміз керек. Пойыз жоғары жылдамдықпен қозғалады және оны бірден тоқтату мүмкін емес. Тіпті машинист шұғыл тежеуді қолданған күннің өзінде жүк немесе жолаушылар пойызының тоқтау жолы 500 метрден 1000 метрге дейін, кейде одан да ұзақ болады. Мұны әрдайым түсіндірумен келеміз, – деді Е.Елғонды.
Бас ревизордың айтуынша, темір жолдағы ең үлкен қауіп – адамның өз мүмкіндігін асыра бағалауы. Үлкен құрам алыстан баяу қозғалып келе жатқандай көрінгенімен, іс жүзінде санаулы секундта жетіп келеді. Сондай-ақ желдің, сыртқы шудың немесе құлаққаптың әсерінен пойыздың дыбысы дер кезінде естілмей қалуы мүмкін.
Осыған байланысты теміржолшылар азаматтарды қарапайым қауіпсіздік ережелерін қатаң сақтауға шақырады. Қаперде ұстайтын қағида – темір жолды тек арнайы өткелдермен, көпірлер немесе тоннельдер арқылы кесіп өткен жөн. Өтпес бұрын құлаққапты шешіп, телефонға алаңдамау қажет. Капюшонды да шешкен дұрыс, өйткені ол жан-жақты көруге кедергі келтіреді.
Платформа жиегінде тұру да аса қауіпті. Жоғары жылдамдықпен өткен пойыздың ауа ағыны адамды тепе-теңдігінен тайдырып, рельске қарай тартып кетуі мүмкін. Сондықтан қауіпсіздік сызығынан асуға болмайды. Сонымен қатар теміржол бойында суретке түсуге, бейне түсіруге, серуендеуге немесе вагондардың астынан еңбектеп өтуге, автотіркегіштің үстінен аттауға қатаң тыйым салынатыны туралы ақпарат әрдайым түсіндіріледі. Бірақ жылжымалы құрамның кез келген сәтте қозғалып кетуі мүмкін екенін қаперінде ұстайтындар аз.
Темір жолдағы қауіпсіздік – әр адамның жеке жауапкершілігі. Бір сәттік немқұрайлылық орны толмас қайғыға әкелуі мүмкін. Темір жол қателікті кешірмейді.