Еңбек ер атандырған Ерлан

Бір мақсатты көздейтін сан тармақты теміржол саласында машинистің орны бөлек. Бұл әлемде темір жол пайда болғалы бірге келе жатқан кәсіп екені де рас. Сол көне кәсіпті серік етіп, отарбаны ұршықтай үйіретін майталман машинистер қатарында атыраулық Ерлан Тарихов та бар.

Ол 1970 жылы Гурьев облысы, Теңіз ауданында дүниеге келген екен. Мектеп бітірген соң Гурьев теміржол техникумында білім алып, техник-механик мамандығын алады. Отан алдындағы борышын өтеп келген соң Ганюшкино локомотив бригадалары алмасу депосына жұмысқа қабылданып, 1997 жылдарға дейін тепловоз машинисінің көмекшісі болды. Одан кейін тепловоздың оң қанатына отырып көп жыл машинист, одан кейін машинист-нұсқаушы болып қызмет атқарды. Өндірістен қол үзбей Алматыдағы М.Тынышпаев атындағы Көлік және коммуникация академиясын инженер-механик мамандығы бойынша бітіріп, жоғары білім алды.

2007 жылдан бастап Ерлан Тарихұлы Атырау локомотив пайдалану депосының Ганюшкино айналым депосы бойынша орынбасары болып тағайындалып, еңбек жолын одан әрі жалғастырды. Өз ісіне үлкен жауапкершілікпен қарайтын, ісіне адал, адамдармен қарым-қатынаста талапшыл әрі әділ азамат ортада сыйлы, қадірлі. Көлік және байланыс қызметкерлерінің күніне орай әр жылдарда «Локомотив» АҚ Президентінің Құрмет грамотасымен, «Қозғалыс қауіпсіздігі үшін» кеуде белгісімен, «Тәуелсіздікке 25 жыл» медалімен марапатталған. Ал 2021 жылы «Адал еңбегі үшін» төсбелгісімен марапатталды.

Кейіпкеріміз бүгінде өзінің сүйікті кәсібіне қайта оралып, тепловоз машинисі қызметін абыроймен атқарып жүр. Отбасында үш бала тәрбиелеп отыр, немере-жиендері бар. Ұлдары – әке жолын қуған теміржолшылар.

Биылғы кәсіби мереке қарсаңында арнайы Астанаға шақырылған Ерекеңнің еңбегі тағы да өз марапатын иеленбек. Еңбек ер атандырар деген осы емес пе?!