Алпыс жылдық абыройлы жол

Өткен ғасырдың 60-жылдары түбектен мұнай фонтаны атқылап, жер қойнауындағы қара алтынды игеру мақсатында Маңғыстауға темір жол тартылды. Құла түзге жан бітірген темір жолға қызмет көрсету үшін жол дистанциясы құрылды. Биыл Маңғыстау жол дистанциясының ашылғанына 60 жыл толып отыр.

Дистанцияның алпыс жылдығы теміржолшылар күнімен тұспа-тұс келіп, маңғыстаулық жолшылар үш бірдей датаны қатар атап өтті. Маңғышлақ жол дистанциясының құрылғанына 60 жыл толса, мекеменің негізін қалаған Сағынай Қошқарбаевтың туғанына – 100 жыл. Осыған орай дистанциялықтар ең алдымен ардагерлер құрметіне мекеменің алдына Құрмет тақтасын орнатты. Дистанция телімдерін жаяу жүріп аралап, аяққа тұрғызған Сағынай Қошқарбаев пен 500-ден астам теміржолшы отбасының Түркіменстаннан атамекенге қоныс аударуына себепкер болып, мамандар тапшылығын шешкен кадр бөлімінің бастығы Есберген Ерпановқа арнап мекеме ғимаратының қабырғасына мемориалдық тақта орнатты.  

Сағынай Қошқарбаев 1966-1986 жылдар аралығында дистанцияны басқарған Құрметті теміржолшы, ҰОС тыл ардагері. Ал Есберген Ерпанов 1966-1975 жылдар аралығында дистанциядағы кадр мәселесімен айналысып, мамандар тартуда тарихи іс тындырып, артында өшпес із қалдырған теміржолшы болғаны айтылады.  

Құрмет тақтасына дистанцияның қалыптасуы мен дамуы жолында еңбек еткен жандардың, атап айтқанда дистанциядан шыққан 20 Құрметті теміржолшының, «Құрмет» және I, III дәрежелі «Еңбек даңқы» ордендерімен марапатталған 6 азаматтың, ауыр еңбектен зейнетке шыққан 24 әйел-ананың, дистанцияның тарихында өзіндік із қалдырған 56 ардагердің суреті мен аты-жөні жазылған.  

Мерейтой осы ескерткіш белгілерді ашудан басталды. Салтанатты шараға алыс-жақыннан арнайы шақырылған қонақтар, жол дистанциясында еңбек еткен кешегі-бүгінгі теміржолшылар мен олардың ұрпақтары қатысты.  

Көзкөргендер естеліктерімен бөлісті. Жиырма жылдан астам осы мекеменің өркендеуі жолында қызмет етіп, дистанцияның екінші басшысы болған Қожахмет Уәзір, басқа ардагерлер өткен күндерден сыр шертіп, марқұм болған әріптестер рухына құран бағышталды.

Жиын орталық мәдениет үйінде жалғасты. Мұнайлы ауданы әкімінің орынбасары Асхат Нұрмұхан теміржолшыларды төл мерекесімен, дистанция ұжымын атаулы мерейтойымен құттықтап, бірқатар азаматтарға аудан әкімінің Алғыс хатын табыстады. Дистанциялықтарды «ҚТЖ-Жүк тасымалы» Маңғыстау филиалының директоры Ерназар Ізтұрғанов пен Маңғыстау магистральдық желі бөлімшесінің директоры Қарақат Жақанов құттықтап, бірқатар марапат тапсырды. Қожахмет Уәзір мен Үсен Имаш Үздік ардагер, бірқатар дистанциялықтар Үздік жол жөндеуші, Үздік жүргізуші, Үздік машинист, Үздік көлік шеберхана маманы, Үздік құрылысшы, Үздік диспетчер, Үздік маман, Үздік жол бапкері, Үздік жол шебері, Үздік жол айналымы, Үздік жол телімі аталымдарына ие болды. Дистанцияның тарихы туралы екінші кітаптың тұсаукесері жасалып, ардагерлерге сыйға тартылды. Әрі қарай мереке концерттік бағдарламаға ұласып, кешке дейін жалғасты.