Басты өлшем – қозғалыс қауіпсіздігі

Пойыздардың қозғалыс қауіпсіздігін қамтамасыз ету – сан түрлі қызмет иелерінің бірлескен жауапты еңбегінің нәтижесі. Солардың қатарында сигнализация және байланыс жүйесінің орны ерекше. Өйткені СОБ құрылғылары – теміржол қозғалысының сенімділігін қамтамасыз ететін маңызды жүйе.

Ағымдағы жылдың алғашқы жеті айының қорытындысы Әбдірахман Сырғабаев басқаратын Қызылорда сигнализация және байланыс дистанциясының жүйелі жұмысын көрсетіп отыр. Есепті кезеңде дистанция қызметкерлерінің кінәсінен пойыздардың апатқа ұшырауы, оқиғалар мен инциденттердің орын алуына жол берілмеген. СОБ құрылғыларының жұмысында 9 ақау тіркеліп, өткен жылдың сәйкес кезеңіндегі 20 жағдаймен салыстырғанда 11-ге азайған. Бұл – ақауларды алдын ала анықтап, техникалық қызмет көрсетуді күшейтудің және мамандардың жауапкершілігінің нәтижесі.  

СОБ құрылғыларының үздіксіз жұмысын бақылаудың арқасында апаттық жағдайлардың алдын алуы мүмкін екендігіне бір ғана мысал келтіріп сараптама жасайтын болсақ, үстіміздегі жылдың 18 наурыз күні Тереңөзек – Қараөзек аралығында №34 пойызды басқарып келе жатқан машинист Созақбаевтың №18 өту аралық бағдаршамның қызыл түсіне тоқтауын алуға болады. Пойыздың тоқтауына байланысты жедел тексеру-бақылау жүргізу барысында осы аралықтағы 2778 км 7-жүздігінде оң жақ рельс плетінің сынғаны анықталды. Жол дистанциясы бастығының орынбасары Б.Мамедалиевтің өтінішімен пойыз диспетчері Аманбаев аталған аралықты пойыздар қозғалысына жабуға пәрмен беріп, жол дистанциясы жұмысшыларының күшімен жол жөнделіп, пойыздар қозғалысы 25 км/ сағаттан аспайтын жылдамдықпен шектеу беру арқылы ашылды.

– Пойыздар қозғалысының қауіпсіздігін қамтамасыз ету – барлық теміржол қызметкерлерінің басты міндеті. Әрбір маман өзіне жүктелген міндетті мінсіз орындағанда ғана ортақ нәтижеге қол жеткіземіз. Бүгінгі көрсеткішке тоқмейілсуге болмайды. Алдағы міндет – құрылғылардың сенімділігін одан әрі арттырып, ақаулардың алдын алу және заманауи технологияларды тиімді енгізу, – дейді Қызылорда сигнализация және байланыс дистанциясының бастығы.  

Бүгінде дистанция ұжымы 511 бұрма мен 371,4 км автоблоктау жүйесіне, сондай-ақ 667,7 км кабель желісіне тұрақты қызмет көрсетеді. Техникалық нысандардың едәуір бөлігі ұзақ жылдар бойы пайдаланылып келе жатқанына қарамастан, мамандар құрылғылардың тұрақты жұмысын қамтамасыз етіп келеді. Есепті кезеңде бірқатар станцияларда электр жетектері, бағдаршамдар, кабель желілері, қоректендіру жабдықтары жаңартылып, техникалық инфрақұрылымды жетілдіру жұмыстары жүргізілуде. Сонымен бірге Ақмая– Шиелі аралығы сандық кодты автоблоктауға көшіріліп, Майлытоғай – 16-бекет аралығында ЦАБ АЛСО жүйесі іске қосылды.