Сербияның Нови-Сад вокзалындағы қайғылы оқиғадан 14 адам қаза тапты
Сербияның халқы көп екінші қаласы Нови-Садтың теміржол вокзалында бетон шатыр құлап, 14 адам қаза тауып, 30-дан астам адам жарақат алды, деп хабарлайды Rail-news.kz.
Трагедия 1 қараша күні күндіз орын алды. 2 қараша ұлттық аза тұту күні деп жарияланды.
«Оқыс оқиғадан 14 адам қайтыс болды, бұл соңғы сан деп үміттенеміз. Олардың ішінде біз бес адамды анықтай алмадық», - деді ел президенті Александр Вучич.
Бетонннан жасалған шатыр жергілікті уақыт бойынша түске таман вокзал сыртындағы орындықтарда отырған адамдардың үстіне құлаған.
Вокзал ғимараты 2021 жылы қайта жөндеуден өтіпті, сондай-ақ биыл 5 шілдеде ресми ашылуы үшін тағы да жөндеу көрген.
Аталған қайғылы оқиғаға қатысты Қасым-Жомарт Тоқаев Сербия Президенті Александр Вучичке көңіл айту жеделхатын жолдады.
Мемлекет басшысы Нови-Сад қаласындағы теміржол вокзалында болған қайғылы оқиға салдарынан көптеген адамның қаза табуына байланысты Сербия Президенті Александр Вучичке көңіл айтты.
«Осындай ауыр сәтте достас Сербия халқының қайғы-қасіретіне ортақтасып, барша қазақстандықтардың және жеке өз атымнан Сізге, жақындарынан айырылған отбасыларға қайғыра көңіл айтамын. Оқыс оқиғада бақилық болғандардың туыстарына сабыр, ал зардап шеккен жандардың тез арада сауығып кетуін тілеймін»,– деп жазылған жеделхатта.